Qunarly aimaqqa sapar

Syry ketpegen jap-jańa 6 kombain alqapty ustaradai sypyryp keledi. Biyl keýsen jaman emes. Nurkelgen Ábdirashulynyń naýqan aia­ǵynda bidai gektaryna 18 tsent­nerden ainalyp qalady degen esebi bar, diqannyń kóńili toq. Qazir tehnikasynyń túr-túri bar sharýashylyqtar kúzdiń qyńyr minezinen qorqa qoimaidy. Ozyq tehnikalar ónimdi jumys isteidi. «Óteý­lin» sharýa qojalyǵy da solar­dyń qataryna ilesip qal­dy. Qojalyq basshysy sońǵy jyl­dary tapqan tabysyn teh­nika jańalaýǵa jumsap otyr­dy. Alqaptaǵy alty kombain­dy lizingpen alyp, tolyq tó­lep shyqty.

Memleket basshysy aýyl sharýashylyǵy ónimin óndi­rý­men jáne ótkizýmen ainaly­satyn agrarlyq kásiporyn qyz­metimen, sondai-aq egin alqa­by­nyń jai-kúiimen tanys­ty. Qa­zaqstan Prezidentine Qostanai oblysyndaǵy as­tyq ji­naý naýqany men agro­óner­kásip keshenin damytý b­a­ǵytyn­da atqarylyp jatqan ju­mys­tar jóninde baiandaldy.

Qazaqstandaǵy ár tórtinshi tonna astyqty Qostanai oblysy óndiredi. Alqap basynda di­qandarmen kezdesken Elba­sy Nursultan Nazarbaev aýyl sharýashylyǵyn jańa deń­geige kóterý kerektigin ait­ty. Memleket aýyl sharýa­shy­lyǵyna qoldaý kórsetýin jalǵastyra beredi. Osy salany ǵylymnyń qazirgi zamanǵy jetistikterin eskerip, ozyq shetel­dik tájiribeni zerdelei oty­ryp jetildirý qajet. Bul aýyl sharýashylyǵyn sapalyq tur­ǵydan jańa deńgeige kóte­rýge múmkindik beredi, dedi Memleket basshysy.

Alqap basynda Nursultan Nazarbaevqa bidai sort­tary­nyń kórmesi kór­setildi. Onda bidaidyń oblys óńirinde ósi­riletin 19 sor­ty­nyń úlgisi qoiyldy. Al agrarlyq sala eńbekkerleri Qazaqstan Pre­­zidentine óńirge jan-jaqty qol­daýy jáne aýyl sharýashylyǵy salasynda júrgizip otyrǵan tiimdi saiasaty úshin alǵystaryn bildirdi.

Sońynda Nursultan Nazarbaev ji­nal­ǵandarǵa jemisti jumys pen zor tabys tiledi.

Memleket basshysynyń Qos­ta­naiǵa sapary «Baian sulý» aktsio­nerlik qoǵamynda jalǵasty.  «Baian sulý» eskiden qalǵan konditer fabrikasy bolǵanymen, táýelsizdik jyldary munyń tek aty ǵana emes, zaty da ózgerip, elimizdegi iri óńdeý kásipornyna ainaldy. Munda taiaý kúnderi pecheneniń birneshe túrin óndiretin bis­kvit tsehy ashylatyn bolady. Oǵan Italiiadan ozyq úlgidegi jabdyqtar alynyp, onyń qurastyrý jumystary júrip jatyr. Tseh elimizdegi tamaq ónerkásibin indýstriialandyrý salasyndaǵy eń iri nysan bolyp sanalady. Bul úshin Qazaqstan Damý bankinen 20 million dollar jeńildetilgen nesie alyndy.

Tsehta jylyna 9500 tonna ónim óndiriletin bolady, 45 adam­­ǵa jumys orny usynylady. Mem­­lekettiń qoldaýymen investitsiia­lar tartýdyń arqa­synda «Baian sulý» konditer fabri­kasy jylyna 65 myń tonna 250 túrli konditer buiymdaryn óndi­redi. Onyń 30 paiyzynan asta­my eksportqa shyǵarylady. Jal­py, kásiporyndy osy deńgei­ge kótergen investitsiia kólemi 3,6 milliard teńgeni quraidy. Qa­zir elimizde ónimniń sapasy men alýan túrliligi jáne óndiris­tiń qýattylyǵy jóninen «Baian sulý­dyń» aldyn oraityn kásiporyn joqtyń qasy.

Shyǵarylǵan kólik iesin tabady

 «AgromashHolding» zaýyty sońǵy alty jyldyń ishinde 4000 mashina qurastyryp shyǵardy, sonyń barlyǵy da satylyp, ie­sin tapty. Nursultan Ábishuly «Ag­ro­mashHolding» AQ direktor­lar keńesiniń tóraǵasy Din Kim­nen sheteldik tehnikalar men jer­gi­likti zaýyt qurastyrǵan mashina­lardyń aiyrmashylyǵyn surady. «Sheteldik mashinalar bizdiń qu­rastyryp shyǵarǵan mashinalarǵa qaraǵanda 3 ese qymbat jáne olar­dyń tehnikalyq shamasy 10-15 paiyzǵa tómen», dep jaýap berdi Din Kim. Zaýyt qurastyrǵan ma­shi­nalar úshin qýatty servis je­lisin qurýdyń arqasynda ishki na­ryqtyń 40 paiyzyn qam­typ otyr. Aldaǵy jyly bul kórset­­kishti 50 paiyzǵa jetkizý meje­len­gen. Sonymen qatar, «Agro­mash­­Holding» zaýytynyń mashina qurastyrý úderisinde qazaq­standyq úles 50 paiyzdy quraidy.

Kórmede Elbasy jumyrtqa ón­diretin jáne et óńdeitin  kásiporyndar janyna toqtady. Qai­rat Maishev basqaratyn «Jas qanat-2006» qus fabrikasy­na ótken jyldary jańǵyrtý jumys­tary júrgizildi. Sonyń arqasynda jylyna 220 million jumyrtqa óndiredi, 229 adam jumyspen qam­tylǵan. Kelesi jyldan bas­tap qus etin óndiretin óńdeý jelisi iske qosylady. Al  Almat Tursynov oblysta et óndirisin zamanaýi damytýǵa izdenip júrgen kásipker. Ol qurǵan «Qarasý-Et» et kombinaty et ónimderiniń túr-túrin óndiredi, Reseige shyǵarady. «Qarasý-Et» óndirgen et ónimderi Qostanaidaǵy jáne taǵy basqa qalalardaǵy eń úzdik meimanhanalardy qamtamasyz etedi. Elbasy, sonymen qatar, kórmede ósimdik maiyn, tez pisetin kespe, sút ónim­derin, aýyl sharýashylyǵy tehni­kalaryn, kókónis óndiretin kásip­oryndar ónimderin nazarynan tys qaldyrmai, kásipkerlermen pikir­­lesýge ýaqyt tapty. Ónimder sa­pa­ly­lyǵymen, naryqta óz ornyn tabýy­men tánti etti.

Munan keiin Elbasy «Sary­Arqa­AvtoProm» zaýyty kórsetken elektromobil mashinalaryn aralady. Negizi bul kásiporyn otandastardyń mashinaǵa degen suranysyn qamtamasyz etip otyr. Zaýyt avtobýstardyń, júk jáne jeńil júrdek mashinalardyń birneshe túrin shyǵarady. Eks­port­qa shyǵarylatyn Qazaq­stan­da jasalǵan tórt túrli mashi­na­nyń úsheýi qostanailyq «Sary­ArqaAvtoProm» zaýytyna tie­sili ekenin aitty Nursultan Nazar­baevtyń suraǵyna jaýap ber­gen AllurGroup direktorlar keńe­siniń tóraǵasy Andrei Lavren­tev. Sońǵy ýaqytta zaýyt elek­tro­mobilderdi sapqa qoia bastady. Nursultan Ábishuly elektromo­bildiń bireýiniń rýline ózi otyryp, júrgizip kórdi. EKSPO-2017 kórmesi qarsańynda Astana qala­synda elektromobilderdi elektr energiiasymen qýattaityn 100 stansa salý jobasy qaralyp jat­qanyn da jetkizdi zaýyt ókili.

Elbasynyń Qostanai oblysyna saparyn E.Ómirzaqov atyndaǵy filar­moniianyń kúmbezdi zalynda jurtshylyq ókilderimen kezdesý túiindedi. Onda oblys ákimi Arhimed Muhambetov oblys óńirindegi jasalyp jatqan ju­mys­tardan habardar etti. Qunarly, qýatty Qostanai óńirinde 1991 jyly 10 million teńgeniń óner­kásip ónimi óndirilgen eken, ótken jy­ly bul kórsetkish 443 mil­liard teń­geni qurady. Osynyń ózi-aq  Qos­­tanai óńiriniń qýatyna kýá bol­sa kerek.

Memleket basshysy ji­nal­ǵan qaýymdy Táýelsizdiktiń 25 jyldyǵymen quttyqtap, respýb­li­kanyń eleýli jetistikterin atap ótti.

– Bizdiń barlyq jetistigimiz myqty irgetasqa – el ishindegi bei­bitshilik pen turaqtylyqqa negizdelgen. Ulttyq birlik pen kelisim – Táýelsizdigimizdiń basty jetistigi. Saiasatta, ekonomikada, qoǵamda, mádeniette túbegeili ózgerister boldy. Memleketimizdiń halyqaralyq bedeli aitarlyqtai artty. Atap aitqanda, syndarly syrtqy saiasatymyz jáne álemdik an­ti­ia­drolyq qozǵalystaǵy barsha jurt moiyndaǵan kóshbasshy­lyǵy­myz Qazaqstannyń BUU Qaý­ip­sizdik Keńesiniń turaqty emes mú­she­ligine qabyldanýyna septi­gin ti­gizdi, dedi Nursultan Nazar­baev.

Qazaqstan Prezidenti eli­miz shirek ǵasyrda álem jurt­shy­lyǵyna tanylyp, áleýmettik-eko­nomikalyq jáne mádeni áleýe­ti­mizdiń artýyna septigin tigizgen aýqymdy nátijelerge qol jet­­kizgenine toqtaldy. Keler jyly Qa­­zaqstan EKSPO-2017 halyq­­aralyq mamandandyrylǵan kórme­sin TMD aýmaǵynda birinshi bolyp ótkizgeli otyr. Bul is-sharaǵa 100-den astam el jáne kóp­tegen halyqaralyq uiymdar qaty­sady. Qazaqstannyń árbir óńiri osy tarihi oqiǵany tabysty ótkizýge qomaqty úlesin qosýy kerek, dedi Memleket basshysy.

Áńgime barysynda Nursultan Nazarbaev Qostanai jeri Qazaq­stan­nyń negizgi astyqty aimaǵy­nyń biri ekenin airyqsha atap aitty. Damyǵan taý-ken jáne mashina jasaý sektorlary bar iri agrarlyq-ónerkásip kesheni osy óńir úshin ǵana emes, búkil respýblika úshin de myqty ekonomikalyq baza bolyp sanalady. Qostanai – aýyl sha­rýashylyǵy damyǵan basty óńirlerdiń biri, bul óńir elimizdiń azyq-túlik qaýipsizdigine qomaqty úles qo­sýda. Oblystaǵy aýyl sha­rýa­shy­ly­­ǵynyń jalpy ónimi 25 jyl ishinde 295 milliard teńgege deiin ósti, dedi Memleket basshysy.

Qazaqstan Prezidenti sondai-aq óńirdiń resýrstyq áleýetine jáne damyǵan ónerkásibine nazar aýdardy. Munda asbest qorynyń 100%-y, respýblikadaǵy aliýminii shikizatynyń 98%-dan astamy jáne temir rýdasynyń 93%-y shoǵyrlanǵan. Indýstriialandyrý jyldarynda oblysta 121 milliard teńge investitsiia tartylǵan 82 joba iske qosyldy. Osyǵan orai 5 myńǵa jýyq jańa jumys orny ashyldy. Indýstriialandyrý avtomobil qurylysy men metallýrgiia siiaqty óńdeý ónerkásibiniń jańa sektorlaryn qalyptastyrýǵa múmkindik týdyrdy. 2010 jyldan beri 29 myńǵa jýyq jeńil avtokólik qurastyryldy, dedi Nursultan Nazarbaev.

Elbasyna qostanailyqtar da jyly sózin, aqjarma tilekterin aitty. Nursultan Nazarbaev Qa­zaq­­stan­nyń bolashaǵy tek birlik­te eke­nin atap kórsete kelip, qos­ta­nai­­lyqtarǵa densaýlyq, baqyt tilep, el Táýel­s­izdiginiń 25 jyldy­­ǵymen quttyqtady.

Názira JÁRIMBETOVA,

«Egemen Qazaqstan»

Qostanai oblysy