Qaraǵandyda qulaǵan MiG-31 joiǵysh ushaǵynyń qyzmet kórsetý merzimi kelesi jyly aiaqtalýy tiis. Bul týraly QR Qarýly Kúshteri Áýe qorǵanysy kúshteriniń bas qolbasshysy Nurlan Ormanbetov aitty, dep habarlaidy QazAqparat.
«Komissiia jumysty tekserip, aldyn alý jumystaryn júrgizgennen keiin MiG-31 joiǵysh ushaqtary qaitadan ushyryla bastaidy. Apattyń shynaiy sebebin anyqtaý úshin ushaqty quraýshy kásiporynnyń ókilderi de, ushaqtyń ózin jóndegen adamdar da tartylady», - dedi Nurlan Ormanbetov OKQ-da onlain rejimde ótken baspasóz máslihatynda.
Onyń aitýynsha MiG-31 modeldi ushaqtardyń apaty elimizde buryn da tirkelgen.
«16 sáýirdegi ushý saparlary josparǵa sáikes júrgizilgen. Atap aitqanda bizdiń áýe ushqyshtar quramynyń jaýyngerlik kezekshilik boiynsha daiyndyǵy júrgizilgen. Ushaq aqaýsyz bolǵan. Oǵan arlyq tehnikalyq qyzmet túri kórsetilgen. Ár sapar aldynda olar belgili bir daiyndyqtan, al ekipaj quramy daiarlyqtan ǵana emes, meditsinalyq tekseristen, atap aitqanda ár ushqyshqa mindetti medbike men psihologtyń tekserýinen ótedi», - dedi ol.
Nurlan Ormanbetov MiG-31 joiǵysh ushaǵynyń RF Nijnii Novgorodyndaǵy «Sokol» aviatsiialyq kásipornynan 1991 jyly shyǵarylǵan. Ushý kezinde qoldanylǵanyna 29 jyl bolǵan. Al talap boiynsha tikushaqtyń qyzmet etý merzimi – 30 jyl. Iaǵni 2021 jyly ushaq qoldanystan alyp tastaý kózdelip otyrǵan.
«2013 jyldyń 19 qarashasynda RF Rjev qalasyndaǵy 514-shi aviajóndeý zaýytyndaǵy atalmysh ushaq josparly kúrdeli jóndeýden ótken. Jóndeýden keiin onyń qyzmet kórsetý ýaqyty 8 jyl dep belgilengen», - dedi ol.
Eske sala ketsek keshe Qaraǵandy oblysynda áskeri ushaqtyń apatqa ushyraǵany týraly habarlaǵan edik. Qulaǵan ushaqtan eki sarbaz zardap shekti.
