Kókshetaýda 52 jastaǵy áieldiń qaza tabýyna ákelgen jol-kólik oqiǵasyna bailanysty eki birdei qylmystyq is qozǵaldy. Qaiǵyly jaǵdaiǵa qatysy bar júrgizýshi de, kólik iesi de zań aldynda jaýap beredi, dep habarlaidy Ult.kz.
Politsiianyń málimetinshe, oqiǵa kezinde kólik tizgininde otyrǵan áieldiń júrgizýshi kýáligi bolmaǵan. Tipti ol arnaiy júrgizýshi kýrstarynan da ótpegeni anyqtaldy.
Sonymen qatar, tergeý barysynda kólik iesi — kúdiktiniń kúieýi — basqarý quqyǵy joq adamǵa róldi senip tapsyrǵany belgili boldy. Bul áreketi úshin oǵan da qylmystyq jaýapkershilik qarastyrylyp otyr.
Sot sheshimimen kúdikti áielge qatysty úiqamaq túrindegi bultartpaý sharasy tańdaldy.
Eske sala keteiik, oqiǵa 9 mamyr kúni Kókshetaýdaǵy Saryarqa shaǵynaýdanyndaǵy kópqabatty úi aýlasynda bolǵan. Kólik trotýar mańynda turǵan áieldi qaǵyp, keiin qaita basyp ótken. Oqiǵanyń beinejazbasy áleýmettik jelilerde tarap, qoǵamda úlken rezonans týdyrdy.
Kýágerler aýla ishindegi joldardyń tar ekenin aityp, qaýipsizdik sharalaryn kúsheitýdi talap etýde.
Aita keteiik, Qazaqstanda júrgizýshi kýáliginsiz kólik basqarǵany úshin aiyppul mólsheri 15-ten 100 ailyq eseptik kórsetkishke deiin jetedi. Budan bólek, kólik aiypturaqqa qoiylyp, qosymsha shyǵyndar týyndaidy. Qaitalanǵan jaǵdaida jaza kúsheiip, ákimshilik qamaý nemese júrgizýshi kýáliginen aiyrý da qarastyrylǵan.
