Ulytaý oblysynda alaiaqtyq jasaýǵa oqtaldy dep tanylǵan eki burynǵy politsiia qyzmetkerine qatysty sot úkimi shyqty. Aiyptalýshylar – aýdandyq politsiia bóliminiń tergeý jónindegi burynǵy basshysynyń orynbasary men aǵa tergeýshi, dep habarlaidy ult.kz.
Is materialdaryna sáikes, oqiǵa 2025 jyldyń jazynda Jańaarqa kentinde adam ólimimen aiaqtalǵan tóbelesti tergeý kezinde bolǵan. Tergeý barysynda kýágerlerdiń birine qylmystyq jaýapkershilikke tartylýy jáne qamaýǵa alynýy múmkin ekeni aitylǵan.
Keiin kýágerdi kezdesýge shaqyryp, qylmystyq qýdalaýdan qutylýy úshin 5 million teńge talap etken. Tergeý nusqasy boiynsha, politsiia basshylyǵynyń ókili bul qarajat máseleni «jyly jabýǵa» jáne qadaǵalaýshy organ arqyly sheshýge jumsalatynyn jetkizgen.
Sot qujattaryna sáikes, basqa kýágerlerden de árqaisysynan 1 million teńgeden jinaý usynylǵan. Alaida olardyń biri quqyq qorǵaý organdaryna emes, Ulttyq qaýipsizdik komitetine júgingen.
Arnaiy operatsiia barysynda UQK qyzmetkerleri aqsha berý protsesin baqylaýǵa alǵan. Belgilengen kúni aǵa tergeýshi kýágerden 5 million teńgeni alyp, keiin basshysymen kezdesken. Tergeý dereginshe, ekeýi eldi meken syrtyndaǵy qonaqúi mańynda aqshany bólisip jatqan kezde ustalǵan.
Sot barysynda burynǵy bólim basshysynyń orynbasary kinásin moiyndamai, aqsha talap etpegenin málimdegen. Al aǵa tergeýshi bastapqyda ózin tek deldal retinde kórsetkenimen, keiin kinásin tolyq moiyndap, áreketti basshysynyń tapsyrmasymen jasaǵanyn aitqan.
Sot eki aiyptalýshyny qyzmettik jaǵdaiyn paidalanyp, aldyn ala sóz bailasý arqyly alaiaqtyq jasaýǵa oqtaldy dep tanydy. Ekeýi de 3 jyl 6 ai merzimge bas bostandyǵynan aiyryldy.
Sonymen qatar sottalǵandar memlekettik jáne kvazimemlekettik sektorda qyzmet atqarý quqyǵynan ómir boiyna aiyryldy. Burynǵy bólim basshysynyń politsiia maiory arnaiy ataǵy da keri qaitaryldy.
Úkim ázirge zańdy kúshine engen joq. Sottalǵandar apelliatsiialyq shaǵym túsirgen.
