Astanada eki apaly-sińlili áiel kúieýlerimen birge turǵyn úi keshenderindegi páterlerde zańsyz qyzmet kórsetý oryndaryn uiymdastyrǵan. Qylmystyq toptyń 15 múshesine qatysty tergeý aiaqtalyp, is sotqa joldandy. Bul týraly Bas prokýratýra málimdedi, dep habarlaidy ult.kz.
Tergeý málimetinshe, top 2023-2025 jyldary elorda aýmaǵynda áreket etken. Onyń quramyna kúzetshiler, ákimshiler jáne áleýmettik jeliler men messendjerler arqyly qyzmetterdi jarnamalaǵan adamdar kirgen.
Uiymdastyrýshylar túngi klýbtardan qyzdardy izdep, olarǵa joǵary tabys, baspana, qaýipsizdik pen qupiialylyqty qamtamasyz etýge ýáde bergen. Tergeý barysynda qylmystyq áreketke kámeletke tolmaǵandardy tartý deregi de anyqtalǵan.
Prokýratýranyń málimetinshe, top músheleri keibir klientterdiń mas kúiin paidalanyp, olarǵa kúsh kórsetip, aqshasyn bopsalaǵan. Sondai-aq adamdardy jalǵa alynǵan páterlerde zańsyz ustaǵan.
Barlyq 15 qatysýshy ustalyp, olarǵa qatysty qamaýǵa alý jáne úiqamaq túrindegi bultartpaý sharalary qoldanylǵan.
Elorda prokýratýrasy qylmystyq isti sotqa joldady. Aiyptalýshylardyń áreketine túpkilikti quqyqtyq baǵany sot beredi.
