Almatyda zańsyz internet-kazinolardyń jumysyn qamtamasyz etken adamdar toby anyqtaldy. Olardyń esepshottary arqyly oiynshylardan 110 mln teńgeden astam qarajat túsken, dep habarlaidy ult.kz.
Tergeý málimetinshe, kúdiktiler «Olymp Casino», «Rukh Poker» jáne «7Kcasino» internet-kazinolarynyń tólem júiesin uiymdastyrǵan. Oiynshylardan aqsha qabyldaý jáne ony óńdeý «Rocket.do» onlain-platformasy arqyly júrgizilgen.
Top músheleriniń biri shetel azamaty bolǵan. Ol bank shottaryn paidalanýǵa beretin adamdardy izdep, árqaisysyna 200 dollarǵa deiin syiaqy usynǵan. Keiin tabylǵan dropperler Qazaqstanǵa ákelinip, HQKO-da JSN rásimdetilip, bank shottary ashylǵan.
Tergeý barysynda kúdiktiniń 15 shetel azamatynyń bank shottaryna qol jetkizgeni jáne óz shotyn da paidalanýǵa bergeni anyqtaldy. Nátijesinde 16 dropperdiń shotyna oiynshylardan túsken qarajattyń jalpy kólemi 110 mln teńgeden asqan.
Kúdiktilerdiń biri qamaýǵa alyndy. Taǵy úsh adamǵa eshqaida ketpeý jáne tiisti minez-qulyq týraly qolhat túrindegi bultartpaý sharasy qoldanylǵan.
Qylmystyq is sotqa joldandy. Ózge aqparat Qylmystyq-protsestik kodekstiń 201-babyna sáikes jariialanbaidy.
