Tanymal telejúrgizýshi Anna Danchenko jaqynda ómirden ótken anasy týraly esteligin bólisip, áleýmettik jelide júrek tebirenter jazba jariialady, dep habarlaidy ult.kz.
Telejúrgizýshi anasynyń qazasynan keiin kóńili bosap júrgenine qaramastan, toi júrgizýge týra kelgenin aitty. Onyń sózinshe, shara ieleri ony birneshe ai buryn shaqyryp qoiǵandyqtan, usynystan bas tartýǵa yńǵaisyzdanǵan.
«Júregiń jaraly, biraq toi júrgizip júrsiń… Bireýdiń qýanyshyn buzýǵa meniń quqyǵym joq. Toi ieleri úlken ótinishpen jaz basynda shaqyryp qoiǵan edi. Bas tarta almadym, yńǵaisyzdandym», – dep jazdy Anna Danchenko.
Ol toi barysynda anasynyń qońyraýyn kútýmen bolǵanyn da aitty. Ádette anasy habarlasyp, tamaqtanýyn eskertip, úide kútip otyratyn.
«Qaita-qaita telefonǵa qaraimyn. Anam habarlasýshy edi: “Tamaq iship júr, men seni úide kútip otyrmyn” dep», – dep eske aldy telejúrgizýshi.
Aita keteiik, buǵan deiin telejúrgizýshiniń anasy kóz jumǵanyn habarlaǵan edik. Sonymen qatar, buǵan deiin Anna Danchenko tanymal psiholog Indira Razzaqtan suhbat alǵan.
Anna Danchenko kim?
Anna Danchenko – qazaqstandyq jýrnalist, telejúrgizýshi jáne oqytýshy. Ol Qyzylorda oblysyndaǵy Aral qalasynda ósip, mektepti de sol jerde aiaqtaǵan.
Anna Danchenko joǵary oqý ornynda jýrnalistika mamandyǵyn oqymaǵan. Soǵan qaramastan, televiziia salasyna qyzyǵýshylyq tanytyp, kásibi jolyn osy baǵytpen bailanystyrǵan. Onyń negizgi bilimi pedagogika salasyna qatysty. Keiin filologiia boiynsha magistr dárejesin alyp, 2019 jyly PhD dárejesin ielengen.
Televiziiadaǵy eńbek jolyn Aqtóbe oblystyq telearnasynda bastaǵan. Alǵashqy jyldary tańǵy baǵdarlamany júrgizip, efirdegi tájiribesin shyńdady. Keiin 31 arnaǵa aýysyp, jańalyqtar men avtorlyq jobalardyń júrgizýshisi retinde kórermenge keńinen tanyla bastady. Anna Danchenkony kópshilik "Ómir jáne óner", "Aita bersin" siiaqty baǵdarlamalar arqyly da jaqsy biledi. Ár jyldary NTK telearnasynda tikelei efir júrgizip, keiin "Jetinshi arnanyń" jobalaryna da qatysty.
Jýrnalistik qyzmetimen qatar, ol ustazdyq baǵytta da eńbek etti. Ál-Farabi atyndaǵy Qazaq ulttyq ýniversitetinde jýrnalistika jáne filologiia salalary boiynsha stýdentterge sabaq bergen.
Anna Danchenko qazaq, orys jáne aǵylshyn tilderin meńgergen. Qazaq tilindegi televiziialyq jobalardy júrgizýi arqyly ol otandyq media keńistikte ózindik qoltańbasyn qalyptastyrǵan jýrnalisterdiń biri sanalady.
Sonymen qatar, jýrnalist jýyrda ǵana sottalǵan Nursultan Jaqsygennen de suhbat alǵan.
