Qazaqstan Ulttyq banki tóraǵasynyń orynbasary Oleg Smoliakov «Qazaqstan Halyq banki» AQ-tyń «Kazkommertsbank» AQ-tyń aktsiialar paketin satyp alýy boiynsha áleýetti mámilesine túsinikteme berdi, dep habarlaidy QR UB baspasóz qyzmeti.
Birinshi kezekte O. Smoliakov «zańnamanyń talaptaryna sáikes áleýetti mámileni iske asyrý bankterdiń depozitorlarynyń, kreditorlarynyń, ózge de klientteriniń jáne qarsy agentteriniń halyqaralyq mindettemelerdi qosa alǵanda, sharttar boiynsha quqyqtar men zańdy múddelerin saqtaǵan jaǵdaida ǵana múmkin bolady» dep atap ótti.
«Halyq bankiniń «Kazkommertsbank» AQ-tyń aktsiialaryn satyp alý boiynsha áleýetti mámileni iske asyrý úshin Ulttyq Banktiń jáne Halyq bankiniń tarapynan «Kazkommertsbank» AQ aktivteriniń sapasyna birlesken táýelsiz tekserý júrgizý qajet. Áleýetti mámileniń sandyq ólshemderi alynǵan aqparatty jariia ashý arqyly táýelsiz tekserý nátijelerin alǵannan keiin aiqyndalatyn bolady», - dedi O. Smoliakov. Ol sondai-aq «Kazkommertsbank» AQ-tyń úzdiksiz qyzmetin qamtamasyz etý úshin jetkilikti deńgeige deiin «Kazkommertsbank» AQ-ty qosymsha kapitaldandyrý Halyq bankiniń «Kazkommertsbank» AQ-tyń kapitalyna yqtimal kirýine bazalyq talap bolyp tabylatynyn», - atap ótti.
O. Smoliakov «Kazkommertsbank» AQ-tyń kredittik portfeliniń aitarlyqtai úlesi (50%-dan astam) «BTA Bank» AQ-tyń mindettemelerin bildiretinine basa nazar aýdardy. Bul rette «BTA Banktiń» aktivteri qundy qalpyna keltirýdiń uzaq aralyǵyna ie aktivterge jatady. Sonyń saldarynan, olardy «Kazkommertsbank» AQ-tyń ustap turýy úshin qarjy aǵyndarynyń jetkilikti deńgeiin qalyptastyrmaidy. Sondyqtan «Kazkommertsbank» AQ-tyń qarjylyq ornyqtylyǵyn qamtamasyz etý úshin, O. Smoliakovtyń aitýynsha, birinshi kezeńde BTA banktiń aktivterin «Kazkommertsbank» AQ-tan oqshaýlaý qajet. Bul kezeńde «Problemalyq kreditter qory» operator bolyp tabylady. Odan ári bul aktivterdi memlekettik-jeke áriptestik jobalarynyń, onyń ishinde óńirlik damý baǵdarlamalarynyń sheńberinde ekonomikalyq ainalymǵa tartýdy qamtamasyz etý qajet.
Eske sala ketsek, buǵan deiin Ulttyq banktiń QR Úkimeti, QR Ulttyq banki, «Samuryq-Qazyna» UÁQ» AQ, «Problemalyq kreditter qory» AQ, «Kazkommertsbank» AQ (KKB) jáne onyń iri aktsionerleri, «Qazaqstan Halyq banki» AQ (Halyq banki) jáne «BTA Bank» AQ (BTA bank) arasyndaǵy «Kazkommertsbank» AQ aktsiialar paketin satyp alý boiynsha áleýetti mámile týraly ózara túsinistik týraly memorandýmǵa qol qoiylǵandyǵy týraly habarlaǵan.
«Kazkommertsbank» AQ aýqymdy filial jelisi, zańdy jáne jeke tulǵalardyń úlken klienttik bazasy, aitarlyqtai depozittik bazasy jáne tólem jáne bankaralyq naryqtarda edáýir úlesi bar Qazaqstan Respýblikasynyń asa iri júie quraýshy banki bolyp tabylady.
Aita keterligi, «Problemalyq kreditter qory» aktsionerlik qoǵamy Qazaqstan Respýblikasy Úkimetiniń menshigine berilgen. Qor qyzmetiniń negizgi maqsaty - ýákiletti organnyń normativtik quqyqtyq aktileriniń talaptaryna sáikes ekinshi deńgeidegi bankterdiń kredittik portfelderiniń sapasyn jaqsartýǵa baǵyttalǵan sharalardy iske asyrý bolyp tabylady. «Problemalyq kreditter qory» AQ qyzmetiniń negizgi túrleri ekinshi deńgeidegi bankterdiń problemalyq kreditterin satyp alý; ekinshi deńgeidegi bankterdiń satyp alynǵan aktivterin basqarý; óz qyzmetin qarjylandyrý úshin boryshtyq baǵaly qaǵazdardy shyǵarý bolyp tabylady.
