Úkimet úiinde QR Premer-Ministriniń orynbasary Berdibek Saparbaev zeinetaqy júiesin odan ári jetildirý boiynsha jumys tobynyń kezekti otyrysyn ótkizdi, dep habarlaidy Úkimettiń baspasóz qyzmeti.
Memleket basshysy Qasym-Jomart Toqaev Qazaqstan halqyna arnaǵan «Syndarly qorǵamdyq dialog - Qazaqstannyń turaqtylyǵy men órkendeýiniń negizi» Joldaýynda Úkimetke jumys isteitin azamattarǵa ózderiniń zeinetaqy jinaqtarynyń bir bóligin maqsatty paidalaný máselesin pysyqtaýdy tapsyrǵan bolatyn.
Otyrys kezinde «Biryńǵai jinaqtaýshy zeinetaqy qory» AQ basqarma tóraǵasy Janat Qurmanov Qazaqstandaǵy zeinetaqy júiesiniń tiimdiligin baǵalaýdy jáne halyqaralyq tájiribe taldamyn usyndy.
Sonymen qatar zeinetaqy júiesiniń tiimdiligin arttyrý boiynsha birqatar usynystar qaraldy. Atap aitqanda, zeinetaqy jinaqtarynyń bir bóligin turǵyn úi satyp alýǵa nemese bilim alýǵa paidalaný, Biryńǵai áleýmettik qor qurý, biryńǵai áleýmettik tólem engizý jáne basqa da máseleler talqylandy.
Otyrysta atalǵan máseleler boiynsha syndarly talqylaý jasalyp, pikir almasyldy, tiisti usynystar bildirildi. Biylǵy jyldyń sońyna deiin jumys toby uzaqmerzimdi aktýarlyq modelder negizinde zeinetaqy júiesin odan ári jetildirý boiynsha usynystar ázirleitin bolady.
Otyrysqa Eńbek jáne halyqty áleýmettik qorǵaý ministri Birjan Nurymbetov, «Eńbek resýrstaryn damytý ortalyǵy» AQ prezidenti Tamara Dúisenova, «Qazaqstan qarjygerleri qaýymdastyǵy» ZTB Keńesiniń tóraǵasy Elena Bahmýtova, «First Heartland Jysan Bank» AQ Direktorlar keńesiniń múshesi Bolat Jámishev, «Atameken» UKP atqarýshy hatshysy Aliona Romanova, «Strategiialyq bastamalar ortalyǵy» JShS aǵa seriktesi Oljas Qudaibergenov, sondai-aq memlekettik organdar men úkimettik emes uiymdar ókilderi, sarapshylar men qoǵam qairatkerleri qatysty.
