Qazaqstanda qaita qarjylandyrý mólsherlemesiniń ornyna bazalyq mólsherleme aqsha-kredit saiasatynyń negizgi quraly retinde usynylady. Bul týraly búgin Májilistiń jalpy QR Ulttyq ekonomika ministri Rýslan Dálenov aitty, dep habarlaidy QazAqparat.
Ministrdiń atap ótýinshe, mundai shara «QR-nyń keibir zańnamalyq aktilerine ekonomikalyq ósýdi qalpyna keltirý máseleleri boiynsha ózgerister men tolyqtyrýlar engizý týraly» zań jobasynda kózdelgen.
«Aqsha-kredit saiasatyn jetildirýge baǵyttalǵan birqatar túzetýler kózdeledi. Zańnama normalaryn birizdendirý úshin qaita qarjylandyrý mólsherlemesiniń ornyna bazalyq mólsherleme aqsha-kredit saiasatynyń negizgi quraly retinde usynylady. Qarjy naryǵynyń turaqtylyǵy boiynsha sindikattalǵan qaryz berý tetigin jetildirýge baǵyttalǵan túzetýler kózdeledi», - dedi ol.
Ministrdiń aitýynsha, bul birneshe banktiń, halyqaralyq qarjy uiymdarynyń bir shart aiasynda qaryz alýshynyń kredittenýine múmkindik beredi.
«Beirezident bankterdiń, saqtandyrý (qaita saqtandyrý) uiymdarynyń filialdary úshin eldiń qarjy uiymdaryna uqsas talaptardy aiqyndaý usynylady. Mikroqarjy uiymdarynyń qyzmetin qarjy uiymdaryna teńestirý kózdeledi. Bul qarjy qyzmetteriniń adal básekelestigin qoldaýdy jáne tutynýshylardyń quqyqtaryn qorǵaýdy qamtamasyz etedi», - dedi Rýslan Dálenov.
