Qasym-Jomart Toqaevtyń Miýnhendegi jumys saparynyń ekinshi kúni Kýveittiń Premer-Ministri sheih Sabah Halid ál-Hamad as-Sabahpen kezdesýden bastaldy, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy eki eldiń memleketaralyq bailanystarynyń dostyq sipatyn jáne onyń qarqyndy damyp kele jatqanyn atap ótip, ekijaqty jáne kópjaqty formattaǵy ózara yntymaqtastyqty nyǵaitý úshin áleýettiń jetkilikti ekenine nazar aýdardy.
– Biz Islam yntymaqtastyǵy uiymy aiasynda senimdi seriktespiz. Qazaqstannyń astanasy Nur-Sultan qalasynda Islam uiymynyń azyq-túlik qaýipsizdigi jónindegi shtab-páteri ashyldy. Bul da bizdiń ózara yqpaldastyǵymyzǵa tyń serpin beredi, – dedi Memleket basshysy.
Qasym-Jomart Toqaev 2019 jylǵy qańtarda «Jýsan» gýmanitarlyq operatsiiasyn júzege asyrý kezinde áskeri-áýe bazasyn paidalaný máselesin sheshýge kómekteskeni úshin Kýveit úkimetine rizashylyq bildirdi.
Sonymen qatar Qazaqstan Prezidenti eki eldiń ekonomikalyq yqpaldastyǵynyń, sonyń ishinde qurylys, energetika, aýyl sharýashylyǵy, qarjy, investitsiia jáne týrizm salalarynyń áleýeti zor ekenin atap ótti.
Kýveittiń Premer-Ministri Qazaqstanmen bailanystardy nyǵaitýdyń perspektivalaryna joǵary baǵa berdi.
– Elderimiz arasyndaǵy saýda-ekonomikalyq, investitsiialyq, mádeni-gýmanitarlyq, týristik baǵyttarda yntymaqtastyq ornatý úshin úlken áleýet bar, – dedi Kýveit úkimetiniń basshysy.
Sheih Sabah Halid ál-Hamad as-Sabah eki el arasyndaǵy saýda-ekonomikalyq yntymaqtastyq jónindegi úkimetaralyq komissiianyń aldynda mańyzdy mindetter turǵanyn atap ótti. Ol komissiianyń aldaǵy ýaqytta ótetin 4-otyrysynda Qazaqstan-Kýveit qatynastaryn jańa deńgeige shyǵarýǵa múmkindik beretin jańa ádister ázirlenetinine senim bildirdi.
Kezdesý sońynda Qasym-Jomart Toqaev Kýveittiń Premer-Ministrin Qazaqstanǵa saparmen kelýge shaqyrdy.
