Qazaqstannyń halyq ártisi Maqpal Júnisova shyǵarmashylyq jolynyń alǵashqy jyldarynda basynan ótken keleńsiz jaǵdaidy eske aldy. Ánshiniń aitýynsha, 1983 jyly Máskeýde ótetin baiqaýdyń finalyna joldama alǵanymen, sońǵy sátte onyń ornyna basqa adam jiberilgen, dep habarlaidy ult.kz.
Óner iesi bul oqiǵa týraly áleýmettik jelidegi paraqshasynda jazdy. Onyń sózinshe, baiqaýdyń irikteý kezeńinen sátti ótip, aqtyq synǵa qatysý múmkindigine ie bolǵan. Alaida Máskeýge attanar aldynda kútpegen habar estigen. Ánshi sol kezdegi Mádeniet ministrliginen ózine finalǵa barmaitynyn aitqanyn jetkizdi. Al onyń ornyna baiqaýǵa múldem qatyspaǵan basqa adam jiberilgen.
"1983-shi jyldan estelik, finalǵa Moskvaǵa ótip turyp, ornyma múldem qatyspaǵan bireýdiń ketkeni, maǵan sol kezdegi Mádeniet ministrliginen sen barmaityn boldyń finalǵa degeni eske tústi", – dep jazdy Maqpal Júnisova.
Ánshi bul sheshimniń ózine aýyr tigenin jasyrmady. Degenmen arada qansha jyl ótse de, mundai ózgeriske naqty ne sebep bolǵanyn jáne onyń ornyna kimniń barǵanyn ashyp aitqan joq.
Maqpal Júnisovanyń jazbasy jeli qoldanýshylarynyń nazaryn aýdardy. Oqyrmandar óner iesine qoldaý bildirip, onyń qazaq estradasyndaǵy eńbegin joǵary baǵalady.
Kópshilik ánshiniń kezinde kezdesken kedergilerge qaramastan, ónerdegi óz ornyn taýyp, halyqtyń súiispenshiligine bólengenin atap ótti.
Maqpal Júnisova kim?
Maqpal Muhamediiarqyzy Júnisova – qazaq estradasynyń kórnekti ókili, Qazaqstannyń halyq ártisi, Memlekettik syilyqtyń laýreaty. Ol 1964 jyly 11 qańtarda Qaraǵandy oblysynyń Terekti aýylynda dúniege kelgen.
Óner jolyn "Gúlder" ansamblinde halyq ánderin oryndaýdan bastap, keiin "Qazaqkontsert" birlestiginde eńbek etti. Ánshi 1989 jyly Shymkent mádeniet institýtyn támamdaǵan.
1994 jyly Qazaqstannyń halyq ártisi ataǵyna ie bolyp, 1999 jyly Memlekettik syilyqtyń laýreaty atandy.
"Aqqý sazy", "Ǵashyq júrek", "Armandastar", "Jan ana", "Máńgilik saǵynysh" sekildi ánderi arqyly halyqtyń súiispenshiligine bólendi. Ol halyqaralyq óner baiqaýlarynda birneshe márte júlde alyp, qazaq án óneriniń damýyna eleýli úles qosty.
