Sot energetika vitse-ministri Ǵani Sádibekovti eki aiǵa qamaýǵa alý týraly úkim shyǵardy, - dep habarlaidy "Ult aqparat" elordalyq sot baspasóz qyzmetine silteme jasap.
2 naýryzda Astana qalasynyń Almaty aýdandyq № 2 soty kúdikti Ǵani Sádibekov pen Serikbai Jumalinovty qamaýǵa alý týraly bultartpaý sharasyn qarastyrdy.
"Sot úkimimen kúdiktilerdi eki ai merzimge qamaýǵa alý túrinde bultartpaý sharasy shyǵaryldy. 3 naýryzda Astana qalasynyń Almaty aýdandyq № 2 soty kúdikti Bekzat Qadyrberlin men Jan Nurbekovty 2 ai merzimge qamaý týraly úkim shyǵarǵan edi", - delingen sot baspasóz qyzmetiniń ókilderi.
Eske salaiyq, Energetika vitse-ministri Ǵani Sádibekov pen birneshe laýazymdy tulǵa jemqorlyq deregi boiynsha ustalǵan-tyn.
"Sybailas jemqorlyqqa qarsy kúres ulttyq is-qimyl biýrosynyń qyzmetkerleri Energetika ministrliginiń birneshe laýazymdy tulǵasyn ustady. Energetika vitse-ministri Ǵani Sádibekov "Aimaq" JShS merdigerlik uiymynyń basshysy Dýanbek D.-men birige otyryp, biýdjetten asa iri kólemdegi qarajatty jymqyrǵan. Ol qarajat Shýchinsk-Býrabai kýrorttyq ornynda ózendi tazalaýǵa arnalǵan qarajat bolǵan. Osy qylmysqa Energetika ministrliginiń departament basshysy Nurbekov J. men merdiger kompaniianyń ókilderi Jumalinov S. men Qadyrberlin B. qatysqan. Sádibekov qol qoiǵan jalǵan aktilerdiń nátijesinde Energetika ministrligi 2017 jyly oryndalǵan jumystardyń úlken kólemi úshin 3,6 milliard teńge tóledi. Osy somadan 1 milliard teńgeden asa aqsha qolma-qol tólemge ainaldyrylǵan. Tekseris kezinde bul aqshalar tárkilendi", - delingen vedomstvonyń habarlamasynda.
"2018 jyly ózen tazalaýǵa bólingen taǵy 1,5 milliard teńgeni jymqyrý deregine tosqaýyl qoiyldy. Sádibekov, Nurbekov, Dýanbek, Jumalinov jáne Qadyrberlin ustaldy. Sotqa deiingi tergeý júrgizilip jatyr", - dep habarlady agenttik ókili Nurlan Jahin.
Ǵani Sádibekov 1967 jyly 23 qazanda dúniege kelgen. Túrli jyldary (12.2009 - 12.2010 jyldar)Jambyl oblysy ákimi apparatynda basshy qyzmetin, 2010-2013 jyldar aralyǵynda Jambyl oblysy ákiminiń orynbasary, 2013-2016 jyldary Pavlodar oblysy ákiminiń orynbasary qyzmetterin atqardy.
Al energetika vitse-ministri qyzmetine 2016 jyldyń 3 mamyrynda keldi.
