Qazaqstannyń Bas sanitarlyq dárigeri Jandarbek Bekshin koronavirýs infektsiiasy órshigen elderge barmaýǵa keńes berdi, dep habarlaidy "Ult aqparat".
«Qazirgi tańda Qytai Halyq Respýblikasynda jaǵdai turaqty. Onyń sebebi ótken aptada kúndelikti ósý (koronavirýsqa shaldyǵý jaǵdailary) bir kúnde 0,51 paiyz bolǵan edi. Odan keiin 1,1 paiyz (...) Mysaly, ótken táýlikte kúndelikti ósý 0,28 paiyzdy kórsetti. Qazir ol eń tómen deńgeide. Ony qýanyshty ári jaqsy aqparat dep aitýǵa bolady», - dedi Jandarbek Bekshin búgin Ortalyq kommýnikatsiialar qyzmetinde ótken baspasóz máslihatynda.
Dese de, Bas sanitarlyq dáriger keiingi kezde basqa elderde koronavirýs infektsiiasynyń órshýi alańdatyp otyrǵanyn aitady.
«Ósý deńgeii 22 aqpanda 24 paiyz bolsa, ótken táýlikte 21 paiyzdy kórsetti. Absoliýtti sandardy aitar bolsaq, kúndelikti ósýi – 314 jaǵdai boldy. Ótken táýlik boiynsha 347 jaǵdai tirkeldi. Sondyqtan bul másele bizdi óte alańdatady. Sebebi osy elder qolaisyz memleketterdiń qataryna enýde. Olardyń qatarynda Ońtústik Koreia – aýyrý deńgeii boiynsha ekinshi orynda. Bul aýrý Koreia Respýblikasynyń kóbinese eki provintsiiasynda tirkelýde. Basqa da provintsiialarynda 18 jaǵdai bolǵan», - dedi ol.
Jandarbek Bekshin Ońtústik Koreiamen Qazaqstannyń jan-jaqty qarym-qatynasy baryn jetkizdi. Atap aitqanda, qazirgi tańda ol eldiń aýmaǵynda Qazaqstannyń 23 myń azamaty júr. Odan bólek, zańsyz migratsiia da bar.
«Bizdi alańdatatyn taǵy bir el – Italiia. Ol elde resmi aqparat boiynsha 144 jaǵdai (koronavirýsty juqtyrý), al Japoniiada 132 jaǵdai tirkeldi. Teńizdegi krýiz lainerinde de 600-den astam jaǵdai tirkelgeni aitylǵan edi. Sol lainerde 3 jaǵdai ólimmen aiaqtaldy. Bizdi alańdatatyn elderdiń ishinde Singapýr (89), Iran (43), Tailand (35), Malaiziia (22), Vetnam (16) bar. Men bul elderdi nege atap jatyrmyn? Qazaqstan turǵyndaryna aitqym keledi: qazirgi tańda osy atalǵan elderge qajeti bolmasa, barýdan bas tartý kerek. «Nege?» deseńiz - jaǵdai kúnde-kúnde ózgerip tur. Bir ǵana Ońtústik Koreia elin alyp qarasańyz, eki kúnniń ishinde bul el ekinshi orynǵa (virýstyń anyqtalý jaǵdaiy boiynsha) shyǵyp ketti. Erteń osy elderde jaǵdai qiyndaýy múmkin. Osyny este saqtaý kerek. Sondyqtan Ońtústik Koreia, Italiia, Japoniia, Singapýr, Iran, Malaiziia, Avstraliia memleketterine saiahatty, basqa da bolsyn saparlardy josparlaýdyń qajeti joq. Sebebi Japoniiadaǵy lainer sekildi jaǵdaiǵa ushyraý qaýpi bar», - dedi ol.
