Qazaqstannan Reseige eksporttalǵan qyzanaqtarda qaýipti virýs anyqtalǵan joq. Mundai málimetti QR Aýyl sharýashylyǵy ministrligi usyndy, dep habarlaidy "Ult aqparat".
Vedomstvo málimetinshe, 2020 jyldyń jeltoqsanynda Reseidiń veterinarlyq jáne fitosanitarlyq qadaǵalaý jónindegi federaldyq qyzmeti (Rosselhoznadzor) «Green Capital Kazakhstan», «Green Land Alatau» JShS-niń ónimderinde qyzanaq jemisteriniń qaýipti virýsy (Tomato brown rugose fruit virus nemese ToBRFV) anyqtalǵandyǵy jáne «Greenhouse-Qaztomat» JShS óndiretin qyzanaqty alyp kelýge shekteý engizgeni týraly habarlama jibergen. Osyǵan bailanysty QR AShM Agroónerkásiptik keshendegi memlekettik inspektsiia komiteti shuǵyl túrde resmi tekserý uiymdastyrdy. Ósimdikter karantini jónindegi memlekettik inspektorlar, sondai-aq «Fitosanitariia» RMK, «Fitosanitarlyq diagnostika jáne boljamdar ádistemelik ortalyǵy» RMM jáne «Respýblikalyq ósimdikter karantini ortalyǵy» MM mamandary PTR-taldaý júrgizý maqsatynda synamalardy alý úshin «Greenhouse-Qaztomat» JShS-de komissiialyq tekserý júrgizdi.
«Taldaý úshin Resei Federatsiiasynyń «Búkilreseilik ósimdikter karantini ortalyǵynyń» jedel testteri qoldanyldy. Yqtimal qateler men kelispeýshilikterdi boldyrmaý úshin zerthanalyq taldaý ádisteri reseilik uiymnyń mamandarymen birge jasaldy. Saraptama qorytyndysy boiynsha «Greenhouse-Qaztomat» JShS ónimderinde ToBRFV virýstary anyqtalǵan joq. Sondai-aq, obektivtilik úshin kompaniia óz bastamasy boiynsha ónimniń synamalaryn «Groen Agro Control» táýelsiz zerthanasyna (Niderlandy) jiberdi. Qosymsha zertteý nátijeleri boiynsha jylyjai sharýashylyǵynda virýs anyqtalǵan joq. Osyndai komissiialyq tekserýler «Green Capital Kazakhstan» jáne «Green Land Alatau» jylyjai sharýashylyqtarynda júrgizildi. Ol jerlerde de virýs anyqtalmady», - dep atap ótedi vedomstvodan.
Resmi tekserýlerdiń nátijeleri Reseidiń Veterinarlyq jáne fitosanitarlyq qadaǵalaý jónindegi federaldyq qyzmetine habarlanǵan.
«QR AShM Agroónerkásiptik keshendegi memlekettik inspektsiia komiteti Rosselhoznadzordyń is-áreketi EAEO týraly sharttyń talaptaryn óreskel buzady jáne jasandy kedergi bolyp tabylady dep esepteidi. Osyǵan bailanysty Aýyl sharýashylyǵy ministrligi Eýraziialyq ekonomikalyq komissiiaǵa júginýge nietti. Sonymen qatar, QR AShM virýstardy anyqtaý faktileriniń durystyǵyna kúmán keltirdi. Sebebi, Rosselhoznadzordyń Sverdlov referenttik ortalyǵy 2020 jylǵy 11 jeltoqsanda «Greenhouse Kazakhstan» JShS ónimi qaýipti dep qorytyndy bergen. Alaida kompaniia 24 jeltoqsanda sol partiiadan synamalardy alyp, «Búkilreseilik ósimdikter karantini ortalyǵy» FMBM-niń ortalyq zerthanasynda qaita saraptama júrgizýdi talap etkennen keiin atalǵan ónimniń tazalyǵyn rastaityn qorytyndy alǵan», - dedi ministrlikten.
