Jetisý oblysynda Mercedes-Benz Sprinter mikroavtobýsy KamAZ júk kóligimen soqtyǵysyp, saldarynan eki adam qaza tapty. Taǵy 10 jolaýshy jaraqat alyp, aýrýhanaǵa jetkizildi, dep habarlaidy ult.kz.
Óńirlik politsiia departamentiniń málimetinshe, jol apaty Almaty – Óskemen avtojolynyń 143-shaqyrymynda bolǵan. Soqtyǵys kezinde mikroavtobýs KamAZ tirkemesiniń astyna kirip ketken.
«Aldyn ala málimet boiynsha, ońtústik baǵytta qozǵalǵan Mercedes-Benz Sprinter júrgizýshisi ózimen bir baǵytta kele jatqan KamAZ tirkemesimen soqtyǵysqan. Jol apaty saldarynan eki adam oqiǵa ornynda kóz jumdy. Sprinter kóligindegi taǵy 10 jolaýshy túrli jaraqatpen meditsinalyq mekemege jetkizildi», – delingen politsiia habarlamasynda.
Atalǵan fakti boiynsha qylmystyq is qozǵaldy. Qazir sotqa deiingi tergeý júrgizilip, apattyń sebepteri men mán-jaiy anyqtalyp jatyr.
Mikroavtobýs júrgizýshisi ustalyp, ýaqytsha ustaý izoliatoryna qamaldy.
