Qairat Qojamjarov bastaǵan bir top senator áskeri qurylymdardyń janar-jaǵarmai saqtaityn qoimalarynyń sapasy men qaýipsizdigi máselesin kóterip, Úkimet basshysyna depýtattyq saýal joldady, dep habarlaidy QazAqparat.
«Bizdi alańdatyp otyrǵan kúrdeli jaǵdai – elimizdegi áskeri quramdardyń janar-jaǵarmai saqtaityn qoimalarynyń sapasy men qaýipsizdigi. Sebebi biyl Qorǵanys ministrliginiń atalmysh qoimalarynyń 85 paiyzynyń qyzmet kórsetý merzimi ótip ketken. Al kelesi jyly olardyń bári de jaramsyz bolmaq. Sol siiaqty Shekara qyzmeti men Ulttyq ulannyń jabdyqtalýy 52 jáne 30 paiyzdy quraidy. Otynnyń qajetti qory bolmasa, ne ol sapasyz bolsa áskeri tehnika jedel túrde, ásirese tótenshe jaǵdailarda óz mindetterin oryndai almaidy», - dedi Qairat Qojamjarov Parlament Senatynyń otyrysynda.
Onyń aitýynsha jaqynda Qaraǵandy oblysynyń áskeri bólimderiniń birinde jaramsyz qoimadan jarty milliard teńgeniń janarmaiy aǵyp ketkenin aityp ótti.
«Mundai oqiǵalar ekologiiaǵa keltiriletin zalaldy aitpaǵanda áskeri qyzmetkerler men jaqyn mańdaǵy eldimekenderdiń turǵyndarynyń ómiri men densaýlyǵyna qaýip týǵyzady. Ókinishke qarai týra bir jyl buryn mundai qaiǵyly jaǵdai ońtústik óńirde oryn alyp, adam ólimi men orasan zor materialdyq zalalǵa soqtyrdy», - dedi ol.
Senator osy jyldyń naýryzynda Memleket basshysy Qasym-Jomart Toqaev Qorǵanys ministrimen kezdesý barysynda oq-dárilerdi saqtaý nysandarynyń, poligondardyń, áskeri qalashyqtardyń jáne jalpy áskeri kúshterdiń infraqurylymyn jetildirý boiynsha qajetti jumystardy júrgizýdi tapsyrǵanyn eske saldy.
«Memlekettik qorǵanys tapsyrysy aiasynda osy máseleni túkpilikti sheshýdi suraimyz», - dedi Qairat Qojamjarov.
