Merkide kóz jumǵan 19 jastaǵy Madinanyń ólimine qatysty qoǵamdaǵy talqylaý áli de jalǵasyp jatyr. Bul joly áleýmettik jelide marqumnyń qaiyn sińlisine qatysty túrli málimetter tarady, dep habarlaidy ult.kz.
Jýrnalist Jan Ahmadiev Madinanyń anasymen birge marqumnyń qaiyn jurtyna baryp, onyń jeke zattary men kiimderin alyp ketpek bolǵan. Alaida sol jerde taraptar arasynda túsinispeýshilik týyndaǵany aitylady.
Jelide taraǵan videoda marqumnyń qaiyn sińlisi zattardy alyp ketýge qatysty daýys kóterip, «zatty áketińder» degeni estiledi. Sondai-aq kadrda «qalyń mal bergenbiz» degen sóz aitylǵan. Bul jait áleýmettik jeli qoldanýshylarynyń qyzý talqysyna tústi.
Osydan keiin jýrnalist Rýslan Ótepbaiǵa ózin Madinany burynnan tanyǵan áiel habarlasqan. Ol byltyr naýryz aiynda Madinamen ginekologiia bóliminde bir palatada jatqanyn aitqan.
Hat avtorynyń sózinshe, sol kezde Madina júkti bolǵan jáne júktiligine bailanysty aýrýhanada jatqan. Áieldiń aitýynsha, Madina oǵan kúieýiniń jii uratynyn aityp, otbasyndaǵy jaǵdaiyna shaǵymdanǵan.
«Kúieýim ne bolsa da ura beredi» dep jylap aitqan. Sondai-aq qaiyn sińlisi de otbasyndaǵy janjalǵa aralasatynyn aitqan. Hat avtory sol kezde Madinaǵa zorlyq-zombylyqqa shydamai, qaýip tóngen jaǵdaida ol adammen birge turmaýǵa keńes bergenin jazǵan.
Hatta Madinanyń ákesi joq ekenin de aitqany kórsetilgen. Alaida ol bul týraly ainalasyndaǵylarǵa aitqysy kelmei, ákesi bar ekenin jáne jumysqa ketkenin aityp júretinin jetkizgen.
Atalǵan hatta baiandalǵan jaittar ázirge resmi túrde rastalǵan joq. Sondai-aq áleýmettik jelide Madinanyń qaiyn sińlisine qatysty taraǵan ózge de málimetterdiń shynaiylyǵy belgisiz.
Qazirgi tańda Madinanyń ólimine qatysty tergeý jalǵasyp jatyr. Oqiǵanyń naqty mán-jaiyn quqyq qorǵaý organdary anyqtap, taraptardyń málimdemeleri men kýágerlerdiń sózderine quqyqtyq baǵa berýi tiis.
