Jaqynda halyqaralyq «Aq taiaq» kúni aiasynda Qurmet belgisi ordendi kóz aýrýlary Qazaq ǵylymi zertteý institýty Almaty qalasyndaǵy N. Ostrovskii atyndaǵy zaǵip jáne nashar kóretin balalarǵa arnalǵan №4 mektep-internattyń oqýshylaryn oftalmologoiialyq tekseristen ótkizdi.
Kóz aýrýlary QazǴZI-nyń balalar bólimshesiniń oftalmologtary jáne rezident-oftalmologtar 7 men 17 jas aralyǵyndaǵy 200-den asa oqýshynyń kózin tekserip, basqa da kóptegen mańyzdy ish-sharalar atqardy. Birneshe aptaǵa sozylǵan aýqymdy jumystyń nátijesinde, mektep tarihynda alǵash ret balalardyń jasy, diagnozy, júrgizilgen operatsiialarynyń sany, qosalqy aýrýlary jáne ary qarai ne isteý kerektigi jazylǵan elektrondyq baza jasaqtaldy. Tekseris barysynda balalar arasynda aldaǵy ýaqytta kózge refraktsialyq túzetý júrgizý maqsatynda Kóz aýrýlary QazǴZI-da lazerlik jáne hirýrgiialyq emdeýdi qajet etetin 120 jaǵdai anyqtaldy.
Atalmysh mektep 1932 jyly Alma-Ata qalalyq halyq komissariatynyń sheshimimen ashylyp, 1957 jyly zaǵip jáne kózi nashar kóretin balalarǵa arnalǵan oqý ornyna Nikolai Ostrovskiidiń aty berildi. 1971 jyly mektep jańa ǵimaratqa kóship kelip, áli kúnge sol jerde jumys atqaryp keledi. Ol – Almaty qalasyndaǵy kózi nashar kóretin jáne múlde kórmeitin balalardy oqytatyn birden-bir arnaiy oqý orny. Orta mektepte uzaq jyldar boiy orta bilimdi meditsinalyq qyzmetkerden bólek oftalmolog dáriger jumys istep kelgen edi. Alaida sońǵy jyldary elimizde turǵan jerine bailanysty emdelý múmkindigi týyndady degen syltaýmen oftalmologtyń orny qysqaryp, «erekshe» balalar dárigerler tarapynan júrgiziletin qajetti kásibi baqylaýdan aiyrylyp qaldy.
Qazirgi tańda oqý ornynda 32 klass bar, onda 221 bala bilim alady jáne synyptardyń 11-i qazaq tilinde bilim beredi. Mektepte zamanaýi tehnikamen jabdyqtalǵan, interaktivti taqtalar ornatylǵan 15 kabinet, 2 kompiýterlik synyp, úsh sheberhana, sporttyq zal, kitaphana, oqý zaly, oiyn zaly jumys istep tur.
Halyqaralyq aq taiaq kúni 1970 jyly 15 qazanda Halyqaralyq zaǵiptar federatsiiasynyń qoldaýymen bekitilgen. Aq taiaq – zaǵip jannyń simvoly – qoǵamdaǵy deni saý adamdarǵa ortamyzda múmkindigi shekteýli jandardyń ómir súrip jatqanyn, olarǵa bizdiń tarapymyzdan kómek kerek ekenin eske salatyn qasirettiń belgisi.
Aq taiaqtyń tarihy sonaý 1921 jyldan bastalady. Sol jyly kórý qabiletinin aiyrylǵan aǵylshyn azamaty Djeims Bigs kóshedegi kádimgi taiaq ustaýshylardan erekshelenip kóriný úshin qolyna ustaityn taiaǵyn aq túske boiatyp alady. Sonymen birge, ózi siiaqty zaǵip jandarǵa taiaqtaryn aq túske boiaýǵa keńes beredi. Sodan on jyl ótkennen keiin ǵana aǵylshyn úkimeti kózi kórmeitin jandardy aq taiaqpen qamtamasyz ete bastaidy. Keiinnen aq taiaq Frantsiiaǵa jetedi. Al búginde aq tústi taiaq álem boiynsha soqyr jandardyń belgisi bolyp esepteledi.
Sóz sońynda aitarymyz, «Aq taiaq kúni» – jaryq dúnieni emin-erkin kóre almaityn, múmkindigi shekteýli balalarǵa qoǵamnyń nazaryn aýdaryp, olarǵa qolymyzdan kelgenshe járdem berip, janashyrlyqty sezdirip, bolashaqqa degen úmitterin, senimderin nyǵaityp, jaqsylyqqa jeteleýdiń bir múmkindigi. Kún saiyn tańnyń atqany men kúnniń batqanyn tamashalai alatyn jandardy kún sáýlesin kórýdi ańsaityn zaǵip búldirshinderge qol ushyn berýge shaqyrý. Óitkeni mundai balalar bizdiń qamqorlyǵymyz ben kómegimizge muqtaj.
.jpeg)