Qazaqstandyq koých Roza Áshirbaeva áleýmettik jelidegi jazbasynda «kelin» sóziniń ornyna áieldiń qazirgi qoǵamdaǵy mártebesine sai jańa ataý oilap tabýdy usyndy, dep habarlaidy ult.kz.
Onyń pikirinshe, «kelin» sózi búginde nemqurailyq, mysqyl jáne kemsitý reńkin týdyrady. Koých bul sózdiń qoldanystan shyǵyp, bir kúni tarihta ǵana qalýyn qalaitynyn jazdy.
«“Kelin” degen sóz kúnderdiń bir kúni “urshyq”, “kebeje”, “búldirgi” degen sózder siiaqty tek qana tarihta qalǵanyn qalaimyn», – dep jazdy Roza Áshirbaeva.
Ol áieldiń qoǵamdaǵy jáne otbasyndaǵy mártebesi ózgerip jatqanyn atap ótip, jańa ataý qajet ekenin aitty.
Koých aǵylshyn tilindegi daughter-in-law uǵymyna uqsas balama ataý qarastyrýdy usyndy.
«Jańa sóz oilap tabaiyqshy. Áieldiń tarihtaǵy, qoǵamdaǵy statýsy ózgerýde. Jańa sóz kerek», – dedi ol.
Jazba áleýmettik jeli qoldanýshylary arasynda «kelin» sóziniń maǵynasy men qazirgi qazaq qoǵamyndaǵy áieldiń róli týraly pikirtalas týdyrdy.
Bir qoldanýshy bul sózdi batyr atamyz Baýyrjan Momyshuly da unatpaǵanyn jazdy.
"Kelin degen sózdi batyr atamyz Baýyrjan Momyshuly unatpaityn bolǵan! Kelin degen- kelimsek, kelgindi degen sózge taiaidy- dep! Óz marqum ákem kelinin - balam deitin!"
Endi biri "turmysqa shyǵý" sózin de qoldanystan alyp tastaý kerek dedi.
"Durys aitasyz, sosyn turmysqa shyǵý degen sózdi de qurtý kerek, turmys degen sózdiń ózi tirlik, sharýa degen maǵynany bildiredi, sonda qyzdar kúieýge shyqpaidy, tirlik jasaý úshin, sharýa jasaý úshin barady bireýdiń úiine degen sóz ǵoi. Kúieýge shyǵý degen durys bolady!"
Sondai-aq avtordyń oiymen kelispegender de boldy.
"Týystyq ataý emes pa ol? Áieldi qoldanystan shyqqan zattarmen qatar qoiyp, zatqa teńegenińiz be?
Kelin, jezde, baja, ajyn, bári týystyq ataý ǵoi. Bizdiń ulttyń otbasylyq institýty quldyrap, osylai dalbasalap ketkenimizge syrtqy jáne ishki faktorlar da áser etti.
Roza, siz de bir áýletke kelinsiz ǵoi. Erteń buiyrtsa kelinderińiz bolady. Qazaq qoǵamyna batystyń ideologiiasyn tyqpalamańyzshy. Ózimizdiń kinámiz "kelin" degen sózdiń qasietin qurtyp alǵan", - dep jazdý qoldanýshy.
