- Qaraǵandy oblysy Shahan kentinde úidiń bóligi qulaǵan kezde zardap shekken otbasylarǵa kómek retinde Qostanai oblysynyń memlekettik qyzmetshileri 11 million teńgeden astam qarajat jinady, dep habarlady Ult.kz tilshisi QazAqparat agenttigine silteme jasap.
Jinalǵan qarajat «Shahtinsk qalasy Shahan kentinde oryn alǵan tótenshe oqiǵa saldarynan zardap shekken tulǵalarǵa kómek qory» jeke qaiyrymdylyq qoryna aýdaryldy. Qarjy jinaýǵa jergilikti atqarýshy organdar qyzmetkerleri, barlyq deńgeidegi ákimder, oblystyq basqarmalar men vedomstvolyq baǵynysty mekemeler qyzmetkerleri qatysty.
Sońǵy derekke sáikes jinalǵan qarjy 41 mln teńgeni quraǵan.
Qostanai oblysy ákiminiń baspasóz qyzmetiniń jetekshisi Ásiia Aimaǵambetovanyń aitýynsha, qazir óńirde barlyq jylytý kózderi tolyqtai tekserilýde. Buǵan oblys ákimi bastamashylyq etti.
«Jylytý maýsymy bastalarda barlyq jylýmen jabdyqtaý nysandary tekserilgenine qaramastan, oblys turǵyndarynyń qaýipsizdigin qamtamasyz etý úshin qosymsha sharalar qabyldaý qajet», - dep atap ótti óńir basshysy.
Áleýetti táýekelder anyqtalǵan jaǵdaida olardy joiý sharalary qabyldanatyn bolady.
Eske salsaq, 1 qańtarda saǵat 22.40 minýtta Shahan kentinde kóp qabatty úidiń bóligi qulady. 9 adam qaza tapty, olardyń 3-eýi bala. Oqiǵa sebebin arnaiy komissiia tekserýde. Aldyn ala derek boiynsha apat avtomatty jylý júiesiniń aqaýynan bolǵan. Turǵyndar páterlerine oralýda. Sarapshylar úsh kireberisti jaramdy dep tanydy, jylý júiesi qalpyna keltirildi. Bul úshin modýldik qazandyq ornatyldy.
.jpeg)