Qostanai oblysynda 2022 jylǵy tabiǵi órtten zardap shekken Amanqaraǵai ormanyn qalpyna keltirýge arnalǵan aýqymdy volonterlik shara ótti. AGROMASH jáne Allur mashina jasaý kásiporyndarynyń 300-den astam qyzmetkeri 5 myńnan asa qaraǵai kóshetin otyrǵyzdy. Aktsiianyń bastamashysy – jumysshy jastardyń kúshimen qurylǵan «Eńbek jastary» qozǵalysy.
Is-shara Qazaqstan Respýblikasy Prezidenti Qasym-Jomart Toqaevtyń bastamasymen júzege asyrylyp jatqan jalpyulttyq «Taza Qazaqstan» ekologiialyq baǵdarlamasy aiasynda ótti. Baǵdarlama ekologiialyq mádenietti qalyptastyrýǵa, tabiǵatty saqtaý máseleleri tóńireginde qoǵamdy biriktirýge jáne eldiń ekologiialyq tepe-teńdigin qalpyna keltirýge baǵyttalǵan.
Amanqaraǵai ormany – Qazaqstandaǵy mańyzdy tabiǵi nysandardyń biri. Kásiporyn qyzmetkerleriniń kópshiligi úshin ormandy qalpyna keltirýge atsalysý tek azamattyq jaýapkershilik qana emes, júrekke jaqyn jeke oqiǵaǵa ainalǵan. 2022 jyly dál osy azamattar halyqty evakýatsiialaýǵa jáne alapat órt saldaryn joiýǵa qatysqan bolatyn.
AGROMASH zaýytynyń prezidenti Dinara Shúkijanova ormandy qalpyna keltirýge qatysý tótenshe jaǵdai kezinde óńir turǵyndarynyń bir-birine kórsetken qoldaýynyń jalǵasy ekenin atap ótti:
«Amanqaraǵaida órt lapyldap jatqanda, biz beijai qarap otyra almadyq. Bul – meniń týǵan jerim, sol kezde júregimiz qan jylady. Jalyn jaqyndap qalǵan úilerdiń esigin qaǵyp, adamdarǵa zattaryn jinaýǵa kómektestik, alǵashqy meditsinalyq kómek kórsettik. Eske alýdyń ózi qorqynyshty, biraq umytý múmkin emes – ár joly kúiip ketken aǵashtardyń janynan ótkende jan aýyrady. Búgin biz bul jerge basqa maqsatpen keldik – joǵalǵan dúnieni qaita qalpyna keltirip, óńirdiń bolashaǵyna úles qosý úshin keldik».
Shara barysynda volonterlik bastamalar men jastar qozǵalystarynyń eldegi ekologiialyq kún tártibin júzege asyrýdaǵy róline erekshe nazar aýdaryldy. Uiymdastyrýshylardyń aitýynsha, mundai jobalar jaýapkershilik mádenietin qalyptastyryp, adamdardy jasampaz qundylyqtar tóńireginde biriktiredi jáne is júzindegi patriotizmniń úlgisine ainalady.
«Eńbek jastary» qoǵamdyq, áleýmettik jáne ekologiialyq jobalarǵa qatysatyn kásiporyndardyń jas mamandaryn biriktiredi.
Allur zaýytynyń mashinalyq-kontaktyly dánekerleý sheberi Dias Berikov:
«Bizdi týǵan óńirimiz úshin paidaly is jasap, ormandy qalpyna keltirýge naqty úles qosýǵa degen qarapaiym niet biriktirdi. Óz qolyńmen kóshet otyrǵyzǵanda, bolashaq urpaqqa ne qaldyratynyń úshin jaýapkershilikti ózgeshe sezinesiń. Biz óndiriste únemi bir nárse jasap, quryp úirengenbiz, biraq zaýyttan tys jerde de – óz jeriń men memleketiń úshin igi is jasaý mańyzdy. Men úshin patriotizm – qur sóz emes, naqty áreket. Búgin biz dál osyndai mańyzdy is úshin jinaldyq», – dedi.
Kásiporyn qyzmetkerleri ekologiialyq aktsiiaǵa qatysý óńirdiń damýyna naqty úles qosyp, ekologiia men turaqty damý salasyndaǵy mańyzdy memlekettik bastamalardy qoldaýǵa múmkindik bergenin atap ótti.
«Semiozernoe orman sharýashylyǵy mekemesi» KMM basshysy Rinat Serdenbaev biznes pen volonterlik qaýymdastyqtyń óńir ekojúiesin qalpyna keltirýdegi mańyzyn erekshe atady:
«Órtten keiin tórt jyl ótken soń Amanqaraǵai tabiǵaty belsendi túrde ózin-ózi qalpyna keltirý kezeńine ótti. Uiqy kúiinde jatqan qaraǵai tuqymdary jappai óne bastady, degenmen ormanǵa bizdiń kómegimiz qajet. Otyrǵyzý úshin biz eki jyldyq kóshetterdi paidalanamyz. Iri aǵashtarǵa qaraǵanda olar jergilikti topyraqqa tez beiimdelip, osy jermen bite qainasyp ketedi, bul olardyń jaqsy jersinýine kepil bolady. Bul – uzaq jol, biraq biz bolashaq urpaq úshin eńbek etip jatqanymyzdy túsinemiz jáne bul jumysymyzǵa erekshe mán beredi. Mundai bastamalar qoǵamdy tabiǵi murany saqtaý jolyndaǵy ortaq maqsatqa biriktiretindikten óte mańyzdy. Ásirese eńbek ujymdary men jastardyń belsendi qatysyp jatqany qýantady», – dedi.
Eske salaiyq, 2022 jylǵy Qostanai oblysyndaǵy tabiǵi órtter óńir tarihyndaǵy eń iri apattardyń biri boldy. Sonyń saldarynan shamamen 25 myń gektar orman qory zardap shekti.
