Oblys ortalyǵynda qos kósheniń ataýy ózgerýi múmkin, dep habarlaidy QazAqparat tilshisi Qostanai qalasy ákimdiginiń mádeniet bóliminiń jetekshisi Aisulý Áýbákirovaǵa silteme jasap.
Mundai usynys bastamashyl azamattar tobynyń tarapynan bolyp otyr. Olardyń pikirinshe Qostanai qalasyndaǵy eki kósheniń atyn aýystyrý kerek. Anyǵyn aitqanda, Aviatsionnyi kóshesine Sotsialistik Eńbek Eri Kámshat Dónenbaeva esimin berip, Qazaq kóshesin Ábilsai dep ataý usynylyp otyr.
«Qala ákimi Bazyl Jaqypovqa qostanailyqtardyń bastamashyl toby qoǵamdyq hat joldady. Ol hatta dańqty jerlesimizdiń esimin qala kóshesine berý usynysy jazylǵan. Sondyqtan, biz turǵyndardy osy máselege qatysty beijai qalmaýǵa shaqyramyz. Asa mańyzdy túitkilge orai óziniń jeke pikirin bildirýge shaqyramyz», - deidi Aisulý Áýbákirova.
Belgili bolǵandai, Kámshat Dónenbaevanyń esimi týǵan ólkesi - Meńdiqara aýdanyndaǵy Borovskoi kásiptik-tehnikalyq kolledjine de beriledi. Depýtattar sheshimimen qýattalǵan usynys úkimetke joldanady. Sondai-aq, oblys ortalyǵynda irgesi qalanyp jatqan Iýbileinyi shaǵynaýdanynda Eńbek Eriniń atyndaǵy saiabaq paida bolmaq. Saiabaq ishine dańqty jerlesimizdiń eskertkishi de ornatylady.
Al Qostanaidaǵy ardager ustaz Beken Kópeshtiń sózinshe, Narimanov bazarynyń mańynda ornalasqan Qazaq kóshesiniń ataýyn aýystyrý týraly bastama biraz jyldan beri kóterilip keledi.
«Ózi kishkene ǵana aýmaqty alyp jatyr. Osy arada shamaly oilap kórińizdershi, óz jerimizde turyp, Qazaq dep kóshe ataǵanymyz uiat emes pe? Sol sebepti de, bul ýaqyt kúttirmeitin sharýa», - dedi ol.
