وبلىس ورتالىعىندا قوس كٶشەنٸڭ اتاۋى ٶزگەرۋٸ مٷمكٸن, دەپ حابارلايدى قازاقپارات تٸلشٸسٸ قوستاناي قالاسى ەكٸمدٸگٸنٸڭ مەدەنيەت بٶلٸمٸنٸڭ جەتەكشٸسٸ ايسۇلۋ ەۋبەكٸروۆاعا سٸلتەمە جاساپ.
مۇنداي ۇسىنىس باستاماشىل ازاماتتار توبىنىڭ تاراپىنان بولىپ وتىر. ولاردىڭ پٸكٸرٸنشە قوستاناي قالاسىنداعى ەكٸ كٶشەنٸڭ اتىن اۋىستىرۋ كەرەك. انىعىن ايتقاندا, اۆياتسيوننىي كٶشەسٸنە سوتسياليستٸك ەڭبەك ەرٸ كەمشات دٶنەنباەۆا ەسٸمٸن بەرٸپ, قازاق كٶشەسٸن ەبٸلساي دەپ اتاۋ ۇسىنىلىپ وتىر.
«قالا ەكٸمٸ بازىل جاقىپوۆقا قوستانايلىقتاردىڭ باستاماشىل توبى قوعامدىق حات جولدادى. ول حاتتا داڭقتى جەرلەسٸمٸزدٸڭ ەسٸمٸن قالا كٶشەسٸنە بەرۋ ۇسىنىسى جازىلعان. سوندىقتان, بٸز تۇرعىنداردى وسى مەسەلەگە قاتىستى بەيجاي قالماۋعا شاقىرامىز. اسا ماڭىزدى تٷيتكٸلگە وراي ٶزٸنٸڭ جەكە پٸكٸرٸن بٸلدٸرۋگە شاقىرامىز», - دەيدٸ ايسۇلۋ ەۋبەكٸروۆا.
بەلگٸلٸ بولعانداي, كەمشات دٶنەنباەۆانىڭ ەسٸمٸ تۋعان ٶلكەسٸ - مەڭدٸقارا اۋدانىنداعى بوروۆسكوي كەسٸپتٸك-تەحنيكالىق كوللەدجٸنە دە بەرٸلەدٸ. دەپۋتاتتار شەشٸمٸمەن قۋاتتالعان ۇسىنىس ٷكٸمەتكە جولدانادى. سونداي-اق, وبلىس ورتالىعىندا ٸرگەسٸ قالانىپ جاتقان يۋبيلەينىي شاعىناۋدانىندا ەڭبەك ەرٸنٸڭ اتىنداعى ساياباق پايدا بولماق. ساياباق ٸشٸنە داڭقتى جەرلەسٸمٸزدٸڭ ەسكەرتكٸشٸ دە ورناتىلادى.
ال قوستانايداعى ارداگەر ۇستاز بەكەن كٶپەشتٸڭ سٶزٸنشە, ناريمانوۆ بازارىنىڭ ماڭىندا ورنالاسقان قازاق كٶشەسٸنٸڭ اتاۋىن اۋىستىرۋ تۋرالى باستاما بٸراز جىلدان بەرٸ كٶتەرٸلٸپ كەلەدٸ.
«ٶزٸ كٸشكەنە عانا اۋماقتى الىپ جاتىر. وسى ارادا شامالى ويلاپ كٶرٸڭٸزدەرشٸ, ٶز جەرٸمٸزدە تۇرىپ, قازاق دەپ كٶشە اتاعانىمىز ۇيات ەمەس پە? سول سەبەپتٸ دە, بۇل ۋاقىت كٷتتٸرمەيتٸن شارۋا», - دەدٸ ول.
