Qostanaida jas qyz aiazda úsip óle jazdady, dep habarlaidy sputniknews.kz oblystyq ishki ister departamentine silteme jasap.
19 qańtar kúni túzeý mekemesiniń qyzmetkerleri áýejai ǵimaratynan úsh shaqyrym jerden qimylsyz jatqan qala turǵynyn taýyp aldy.
"Jedel bólimniń bastyǵy, ádilet maiory Iliias Boqaev qardaǵy izdi kórip, sol izben júrip otyrǵan. Úsh shaqyrym jerden ol qarda jatqan qyzdy kóredi. Zardap shekken qyz qimylsyz kúide bolǵan, qatty tońǵandyqtan sóilei almaǵan", — dep jazylǵan habarlamada.
Atalǵan oqiǵa 19 qańtar kúni saǵat 21.00 shamasynda qonys koloniiasynyń mańynda bolǵan. Kezekshilikte bolǵan ÝK 161/11 mekemesiniń aǵa inspektor-psihology, ádilet kapitany Dinara Madiiarova bireýdiń aiqailaǵanyn estidi. Er adam Qostanai-Fedorovka avtojolyna jaqyn mańda kómek surap turǵan. Janjaldan keiin onyń dos qyzy avtokólikten túsip, úiine jaiaý ketkeni anyqtaldy.
Departamenttegiler juma kúni synap baǵanasy 28 gradýs aiazdy kórsetkenin atap ótti.
"Aldymen ádilet maiory Iliias Boqaev pen ádilet kapitany Ashat Balambaev qyzdy ónerkásiptik aimaqqa qarai jaiaý izdep shyqty. Sodan keiin ádilet kapitany Nursultan Jumashev pen ádilet aǵa leitenanty Dias Nurahmetov kólikpen kómekke kelgen", — dep naqtylady IID.
Ursysyp qalǵan qyz ben jigitke meditsinalyq jáne psihologiialyq kómek kórsetildi. Bir kese ystyq shai ishkennen keiin jas jigit qyzdan keshirim surady.
