2018 jyly Qostanai oblysynda tótenshe jaǵdailardyń aldyn alýǵa jáne joiýǵa 461 mln teńge bólindi, - dep habarlaidy "Ult Aqparat" tobyl-torgai.kz saityna silteme jasap.
Óńirlik kommýnikatsiialar qyzmetinde ótken brifingte Tótenshe jaǵdailar departamentiniń basshysy Talǵat Kákimov jaǵdaidy tolyq baqylaýda ustap otyrǵanyn aitty. Arnaiy qurylǵan top Arqalyq qalasyndaǵy Úshtóbe, Ashýtasty, Aqjar ózenderiniń ańǵaryn jáne qar sýy jinalatyn sailardy qarap, tekserip shyqqan. Qaratorǵai, Sarytorǵai, Saba ózenderine jaqyn ornalasqan eldi mekenderde jyl saiyn sý tasqyny bolatyn. Biyl ondai qaýip joq dep otyr qutqarýshylar. Amankeldi aýdanyna qarasty Amantoǵai, Úrpek, Qarasý aýylynyń mańyndaǵy Jaldama jáne Torǵai ózenderi de arnadan aspaýy tiis.
Jalpy alǵanda, Qostanai aimaǵynda sý tasqyny boljanyp otyrǵan joq. Sinoptikterdiń habarlaýynsha, túsken qardyń qalyńdyǵy normaǵa jetpeidi.
Ótken jyly oblysta kóktemgi sý tasqyny 97 eldi mekendi álekke túsirgen edi. Sonyń ishinde 40 eldi meken qar sýynan zardap shekse, qalǵany sý qoimalarynyń tasýynan ábigerge salyndy.
– 2017 jyldyń sońynda Qostanai oblysynyń ákimimen «2018 jyldyń oblystaǵy tasqyn kezeńinde tótenshe jaǵdailardy aldyn alý boiynsha is-sharalar jospary» ázirlenip, bekitildi. Qazir ol barlyq qala men aýdandardyń ákimdikterine oryndalý úshin jiberildi. Osyǵan sáikes olar tasqynǵa qarsy shtabtardy qurý boiynsha jumys atqarýda, – dedi TJD basshysy.
«Qazgidromet» oblystyq filialynyń direktory Larisa Kýzminanyń málimetinshe, oblysta qystai jaýǵan qardaǵy sý qory byltyrǵynyń 40% ǵana quraidy eken. Al sý qoimalaryndaǵy sý onyń 68% toltyryp tur, 449 mln tekshe metr sý syiatyn oryn bar. Alaida, sý tasqyny ylǵi qardyń kóptiginen bola bermeidi. Sý ótkizgeshterdiń bitelip qalýynan keptelgen sý oidaǵy aýyldardy basatyn.
Qostanai qalasynda shamamen 8 myń turǵyny bar eki myńnan astam turǵyn úidi qar sýy basýy múmkin. Tótenshe jaǵdailar departamenti mamandary oǵan da daiynbyz dep sendiredi.
– Jergilikti atqarýshy organdarmen birlese sý basýy múmkin alqaptardaǵy osal ýchaskeler anyqtalyp, turaqty baqylaýda ustalyp otyr. Oblystyń Densaýlyq saqtaý basqarmasy sý basý qaýpi bar aimaqta turatyn júkti áielderdi esepke aldy (97 adam). Sý basý aimaǵynan evakýatsiialanǵan azamattardy ýaqytsha ornalastyrýǵa 152 nysandy daiyndap otyrmyz (jataqhana, qonaq úi, bilim nysandary, t.b.), 30 shatyr men 32 kiiz úi de bar. Odan basqa 3 myń 248 kereýet, 6 myń 67 tósek oryn jiyntyǵy jáne 5 myń 798 tonna azyq-túlik daiyndalǵan. Sondai-aq úi janýarlaryn aidaýǵa 46 oryn ázir, – deidi Talǵat Kákimov.
Qysqasy, biliktegiler jaǵymsyz «tosynsyi» bolmaidy dep otyr. Tasqyn sýǵa qarsy qimylǵa Qostanaida 2 262 adam jáne 826 tehnika birligi tartylady. Sý basýy múmkin aimaqtarda 488 injenerlik tehnika, 221 júk kóligi, 137 avtobýs, 83 júzý quraly, 245 sýdy soryp alatyn arnaiy tehnika birligi daiyn tur.
