Qazaqstan Densaýlyq saqtaý ministrliginiń 3 səýir saǵat 18:10-daǵy deregi boiynsha, elde taǵy jeti adamnan virýs tabyldy. Virýs juqtyrǵandardyń biri Qostanai oblysynda. Bul - Qostanaida dertke shaldyqqan alǵashqy adam. Budan bólek, Túrkistan oblysynda úsh adam, Jambyl oblysynda eki adam, ShQO-da bir adamǵa virýs juqty.
Osylaisha, Qazaqstannyń barlyq aimaǵynda koronavirýs anyqtaldy.
Qostanai oblysy ákimdiginiń dereginshe, virýs juqtyrǵan turǵyn – 1991 jyly týǵan áiel adam. Ol 23 naýryzda Sharm-ál-Sheih – Almaty reisimen ushyp kelgen. Almatyda alynǵan analizi taza bolǵan. Keiin ol Otar stansasynan poiyzǵa otyryp, Qostanaiǵa kelgen. Qostanaida da odan analizinen koronavirýs tabylmaǵan. Tek 12-kúni ǵana koronavirýs anyqtalǵan. Onymen birge Egipetten ushyp kelgen úsh adamnyń jáne poiyzda bolǵan 12 adamnyń analizderinen virýs tabylǵan joq.
Al Túrkistan oblysynda juma kúni virýs tabylǵan úsh adamnyń ekeýi – 2019 jyly týǵan bala jáne onyń sheshesi.
Qazir Qazaqstanda 460 adamnan virýs tabyldy. 29 adam dertinen aiyqty. Úsh adam qaitys boldy. 3 sáýirde Qazaqstan densaýlyq saqtaý ministri Eljan Birtanov brifing ótkizip, elde Covid-19 dertine shaldyqqan 11 adamnyń hali aýyr ekenin málimdedi. Birtanovtyń aitqan derekteri:
- Qazaqstanda 28 meditsinalyq qyzmetkerge koronavirýs juqqan.
- Qazir Covid-19 dertine shaldyqqan 11 naýqastyń jaǵdaiy aýyr. Jansaqtaý bóliminde jatyr. Bir naýqastyń jaǵdaiy tym aýyr. 68 adamnyń jaǵdaiy ortasha, 341 adamnyń jaǵdaiy jaqsy ia simptomy joq.
- Qazaqstanda virýs juqtyrǵan 450-den astam naýqaspen 13467 adam bailanysta bolǵan. Olardyń arasynda 442 adam elden shyǵyp ketken. 13025 adam Qazaqstanda. Qazir virýs juqtyrǵandarmen bailanysta bolǵan 96,7% oqshaýlanǵan.
- Virýs taraǵan oshaqtar aýyldarda da bar.
- Almaty men Nur-Sultanda engizilgen qatań karantindik sharalardyń arqasynda koronavirýstyń taralý deńgeii turaqtandy. Virýs juqtyrǵandar sany kúnine 30 paiyzdan aspaidy. Epidemiianyń deńgeii tómendep keledi.
Aita keteiik, osy saǵatta Nur-Sultan qalasy boiynsha 199 adam, Almaty qalasynda – 93 adam, Qaraǵandy oblysynda - 22 adam, Aqmola oblysynda - 19 adam, Atyraý oblysy - 20 adam, Jambyl oblysynda - 8 adam, Shymkent qalasynda - 11 adam, Shyǵys Qazaqstan oblysynda - 4 adam, Almaty oblysynda - 9 adam, Aqtóbe oblysynda - 7 adam, Soltústik Qazaqstan oblysynda - 18 adam, Pavlodar oblysynda - 1 adam, Mańǵystaý oblysynda - 1 adam, Qyzylorda oblysynda - 26 adam, Batys Qazaqstan oblysynda - 2 adam, Túrkistan oblysynda - 19 adam, Qostanai oblysynda - 1 adam koronavirýs juqtyrǵan.
