Qoryqshy Erlan Nurǵalievtiń ólimine jáne onyń áriptesi Petr Nitsykke jasalǵan qastandyqqa qatysy bar úsh brakoner ómir boiyna bas bostandyǵynan aiyryldy, dep habarlaidy Sputnik Qazaqstan.
Sottalýshylar oryndyǵynda barlyǵy jeti adam boldy. Eń joǵarǵy jaza Berik Ahmetov, Qairat Aqshanov pen Nurlan Shúkildikovke berildi.
Qalǵan tórt aiyptalýshy: B. Bazarov, B. Qaiyrbekov, J. Myrzabaev jáne A. Ákimov zańsyz ań aýlaǵany úshin alty jylǵa sottalyp, bes jylǵa osy qyzmetpen ainalysý quqyǵynan aiyryldy.
Sot sonymen birge sottalǵandardy zardap shekken inspektorǵa jáne qaitys bolǵan qoryqshynyń týystaryna moraldyq jáne materialdyq ziiandy óteýge mindetteý týraly sheshim qabyldady.
Sonymen, sottalýshylar zardap shekken Petr Nitsyktiń paidasyna 500 myń teńge materialdyq jáne 6 million teńge moraldyq shyǵyndy óteýi tiis.
Qaza bolǵan inspektordyń aǵasy N. Nurǵalievtyń paidasyna 500 myń teńge materialdyq jáne 9 million teńge moraldyq shyǵyndy tóleýi kerek. Qaitys bolǵan inspektordyń ulynyń paidasyna sottalýshylar 1 million 890 myń teńge kóleminde materialdyq zalaldy jáne 15 million teńge kóleminde moraldyq shyǵyndy tóleidi.
Sondai-aq, aqbókendi atý saldarynan qorshaǵan ortaǵa keltirilgen 89 million 763 myń 750 teńge materialdyq zalal barlyq sottalǵan adamdardan memleket paidasyna óndirildi.
Sot úkimi zańdy kúshine engen joq jáne sottalǵandar oǵan shaǵymdanýǵa quqyly.
Inspektor brakoner qolynan qaza tapty
Eske sala ketsek, 2019 jyldyń 13 qańtarynda Qaraǵandy oblysy Nura aýdanynda brakonerler "Ohotzooprom" kásipornynyń eki inspektoryna shabýyl jasaǵan bolatyn.
Qoryqshylar Erlan Nurǵaliev pen Petr Nitsyk kúdikti ańshylardyń qujattary men kólikterin teksermek bolypty. Kólikti qarap jatqan qyzmetkerlerge úsh brakoner tap berip, soqqyǵa jyqqan. Saldarynan Erlan Nurǵaliev jaraqat alyp, aýrýhanada kóz jumdy.
Qyzmettik boryshyn atqarý ústinde kórsetken batyldyǵy men janqiiarlyǵy úshin marqum qoryqshy III dárejeli "Barys" ordenimen nagradtaldy. Onyń áriptesi Petr Nitsyk te dál sondai orden aldy.
