قورىقشى ەرلان نۇرعاليەۆتٸڭ ٶلٸمٸنە جەنە ونىڭ ەرٸپتەسٸ پەتر نيتسىككە جاسالعان قاستاندىققا قاتىسى بار ٷش براكونەر ٶمٸر بويىنا باس بوستاندىعىنان ايىرىلدى, دەپ حابارلايدى Sputnik قازاقستان.
سوتتالۋشىلار ورىندىعىندا بارلىعى جەتٸ ادام بولدى. ەڭ جوعارعى جازا بەرٸك احمەتوۆ, قايرات اقشانوۆ پەن نۇرلان شٷكٸلدٸكوۆكە بەرٸلدٸ.
قالعان تٶرت ايىپتالۋشى: ب. بازاروۆ, ب. قايىربەكوۆ, ج. مىرزاباەۆ جەنە ا. ەكٸموۆ زاڭسىز اڭ اۋلاعانى ٷشٸن التى جىلعا سوتتالىپ, بەس جىلعا وسى قىزمەتپەن اينالىسۋ قۇقىعىنان ايىرىلدى.
سوت سونىمەن بٸرگە سوتتالعانداردى زارداپ شەككەن ينسپەكتورعا جەنە قايتىس بولعان قورىقشىنىڭ تۋىستارىنا مورالدىق جەنە ماتەريالدىق زيياندى ٶتەۋگە مٸندەتتەۋ تۋرالى شەشٸم قابىلدادى.
سونىمەن, سوتتالۋشىلار زارداپ شەككەن پەتر نيتسىكتٸڭ پايداسىنا 500 مىڭ تەڭگە ماتەريالدىق جەنە 6 ميلليون تەڭگە مورالدىق شىعىندى ٶتەۋٸ تيٸس.
قازا بولعان ينسپەكتوردىڭ اعاسى ن. نۇرعاليەۆتىڭ پايداسىنا 500 مىڭ تەڭگە ماتەريالدىق جەنە 9 ميلليون تەڭگە مورالدىق شىعىندى تٶلەۋٸ كەرەك. قايتىس بولعان ينسپەكتوردىڭ ۇلىنىڭ پايداسىنا سوتتالۋشىلار 1 ميلليون 890 مىڭ تەڭگە كٶلەمٸندە ماتەريالدىق زالالدى جەنە 15 ميلليون تەڭگە كٶلەمٸندە مورالدىق شىعىندى تٶلەيدٸ.
سونداي-اق, اقبٶكەندٸ اتۋ سالدارىنان قورشاعان ورتاعا كەلتٸرٸلگەن 89 ميلليون 763 مىڭ 750 تەڭگە ماتەريالدىق زالال بارلىق سوتتالعان ادامداردان مەملەكەت پايداسىنا ٶندٸرٸلدٸ.
سوت ٷكٸمٸ زاڭدى كٷشٸنە ەنگەن جوق جەنە سوتتالعاندار وعان شاعىمدانۋعا قۇقىلى.
ينسپەكتور براكونەر قولىنان قازا تاپتى
ەسكە سالا كەتسەك, 2019 جىلدىڭ 13 قاڭتارىندا قاراعاندى وبلىسى نۇرا اۋدانىندا براكونەرلەر "وحوتزووپروم" كەسٸپورنىنىڭ ەكٸ ينسپەكتورىنا شابۋىل جاساعان بولاتىن.
قورىقشىلار ەرلان نۇرعاليەۆ پەن پەتر نيتسىك كٷدٸكتٸ اڭشىلاردىڭ قۇجاتتارى مەن كٶلٸكتەرٸن تەكسەرمەك بولىپتى. كٶلٸكتٸ قاراپ جاتقان قىزمەتكەرلەرگە ٷش براكونەر تاپ بەرٸپ, سوققىعا جىققان. سالدارىنان ەرلان نۇرعاليەۆ جاراقات الىپ, اۋرۋحانادا كٶز جۇمدى.
قىزمەتتٸك بورىشىن اتقارۋ ٷستٸندە كٶرسەتكەن باتىلدىعى مەن جانقييارلىعى ٷشٸن مارقۇم قورىقشى ٸٸٸ دەرەجەلٸ "بارىس" وردەنٸمەن ناگرادتالدى. ونىڭ ەرٸپتەسٸ پەتر نيتسىك تە دەل سونداي وردەن الدى.
