Almatyda qudalyqta bolǵan áieldiń koronavirýs juqtyrǵany anyqtaldy. Bul týraly búgin onlain brifing barysynda qalalyq qoǵamdyq densaýlyqty saqtaý basqarmasynyń basshysy Tileýhan Ábildaev aitty, dep habarlaidy "Ult aqparat".
Onyń aitýynsha, Aqmola oblysynyń arnaiy qyzmet ókilderi koronavirýstan qaza bolǵan áieldiń Almatyda qudalyqta bolǵanyn habarlaǵan.
«Almatyda ol áielmen 6 adam jaqyn aralasqany anyqtaldy. Olardyń barlyǵy qazir oqshaýlandy. Olar qudalyqta birge bolǵan. 6 adamnyń ishinde bireýi koronavirýs juqtyrǵan. Ol áiel qaladaǵy juqpaly aýrýlar aýrýhanasyna jatqyzyldy», - dedi Tileýhan Ábildaev.
Basqarma basshysy karantin kezinde ulttyq dástúrlerimizdi toqtata turý kerektigin aitty.
«Ulttyq dástúrlerimiz – qudalyq, betashar siiaqty balalardyń qýanyshyna jasalatyn joralǵylardy toqtatý kerek. Kóp adam bas qosatyn, tamaqtanatyn dástúrler qazir qajet emes. Kóp nárse tártipke bailanysty», - dedi T.Ábildaev.
