الماتىدا قۇدالىقتا بولعان ەيەلدٸڭ كوروناۆيرۋس جۇقتىرعانى انىقتالدى. بۇل تۋرالى بٷگٸن ونلاين بريفينگ بارىسىندا قالالىق قوعامدىق دەنساۋلىقتى ساقتاۋ باسقارماسىنىڭ باسشىسى تٸلەۋحان ەبٸلداەۆ ايتتى, دەپ حابارلايدى "ۇلت اقپارات".
ونىڭ ايتۋىنشا, اقمولا وبلىسىنىڭ ارنايى قىزمەت ٶكٸلدەرٸ كوروناۆيرۋستان قازا بولعان ەيەلدٸڭ الماتىدا قۇدالىقتا بولعانىن حابارلاعان.
«الماتىدا ول ەيەلمەن 6 ادام جاقىن ارالاسقانى انىقتالدى. ولاردىڭ بارلىعى قازٸر وقشاۋلاندى. ولار قۇدالىقتا بٸرگە بولعان. 6 ادامنىڭ ٸشٸندە بٸرەۋٸ كوروناۆيرۋس جۇقتىرعان. ول ەيەل قالاداعى جۇقپالى اۋرۋلار اۋرۋحاناسىنا جاتقىزىلدى», - دەدٸ تٸلەۋحان ەبٸلداەۆ.
باسقارما باسشىسى كارانتين كەزٸندە ۇلتتىق دەستٷرلەرٸمٸزدٸ توقتاتا تۇرۋ كەرەكتٸگٸن ايتتى.
«ۇلتتىق دەستٷرلەرٸمٸز – قۇدالىق, بەتاشار سيياقتى بالالاردىڭ قۋانىشىنا جاسالاتىن جورالعىلاردى توقتاتۋ كەرەك. كٶپ ادام باس قوساتىن, تاماقتاناتىن دەستٷرلەر قازٸر قاجەت ەمەس. كٶپ نەرسە تەرتٸپكە بايلانىستى», - دەدٸ ت.ەبٸلداەۆ.
