Qazaqstan koronavirýspen kúreske 150 mlrd teńge bólgen. QR Premer-ministriniń birinshi orynbasary - Qarjy ministri Álihan Smaiylov aitty, dep habarlaidy QazAqparat.
«Internette keibir blogerler Qazaqstanyń koronavirýspen kúreske 13,5 mlrd dollar jumsaǵandyǵyn jazyp, birshama az qarajat bólingen kórshi elderdiń keibirimen salystyrýda. Bul múldem qate aqparat ekendigin aitqym keledi. Koronavirýspen kúreske nemese indetke qarsy sharalarǵa respýblikalyq biýdjetten shamamen 150 mlrd teńge nemese dollarǵa shaqqanda 350 mln dollar bólindi», - dedi birinshi vitse-premer Úkimet úiinde ótken brifingte.
Onyń túsindirýinshe, atalǵan soma daǵdarysqa qarsy sharalardy júzege asyrýǵa baǵyttalǵan 5,9 trln teńgeniń ishine kiredi.
«Bul -jumyspen qamtý, áleýmettik tólemder, biznesti qoldaý, kásipkerlerdi jeńildikpen kreditteý, turǵyn úi qurylysy jáne basqalary. Bul qarajat jyl boiyna josparlanǵan. Máselen, biznesti jeńildikpen kreditteýge 1 trln teńge jumsalady. Bul qaitarylatyn qarajat, bizneske tómengi mólsherlememen kredit túrinde beriledi», - dedi ol.
Álihan Smaiylovtyń aitýynsha, «Jumyspen qamtý jol kartasyn» júzege asyrýǵa 1 trln teńge baǵyttalady. Onyń 300 mlrd teńgesi biýdjet, al qalǵany biýdjetten tys qarajat sanalady. Bul qarajatqa áleýmettik nysandardy, turǵyn úi-kommýnaldyq sharýashylyq nysandaryn, injenerlik infraqurylymdar salýǵa jáne jóndeýge, eldi mekenderdi abattandyrýǵa jumsalady. 255 myń jumys orny qurylady.
«Iaǵni, Úkimet baǵyttap otyrǵan qarajattyń barlyǵy osy jyl boiy jaratylady. Onyń áleýmettik-ekonomikalyq mańyzy zor jáne halyqty jumyspen qamtýǵa, olardyń kirisin saqtaýǵa jáne eldiń iskerlik belsendiligin qoldaýǵa múmkindik beredi», - dedi Álihan Smaiylov.
