Oralda koronavirýs juqtyrǵan adam turǵan úiden karantin alyndy, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aitýynsha, naýqas turǵan úiden 8 adam karantinge jatqyzylyp, 42-si úide oqshaýlanǵan edi.
Naýqaspen tikelei qarym-qatynasta bolǵan segiz adamǵa qatysty koronavirýstyń bar-joǵyn anyqtaityn test teris nátije kórsetkendikten, búgin úiden karantindi alý jóninde sheshim qabyldandy.
«Atalǵan kóppáterli turǵyn úidiń barlyq kireberisine dezinfektsiia júrgizildi.Degenmen turǵyndar sanitarlyq talaptar men jeke bas gigienalaryn saqtaýǵa mindetti», dedi N.Mustaev.
Al koronavirýs juqtyrǵan ekinshi áiel turǵan Aqsaidaǵy kóp páterli úi áli de karantinde. Onda alty adam úide oqshaýlanýda.
«Qazirgi kezde naýqastardyń ekeýi de oblystyq juqpaly aýrýlar aýrýhanasynda, jaǵdailary qalypty. Oblysta barlyǵy 93 adam karantinde jatyr. Oǵan qosa 792 adam úilerinde oqshaýlanǵan», dedi QazAqparat tilshisine Nurlybek Mustaev.
Eske sala keteiik, budan buryn BQO-da karantinnen qashqan adamǵa aiyppul salynyp, shekteý sharalary kúsheitilgenin jazǵan bolatynbyz.
