Vitse-Prezident Erlan Qarin álemge áigili akter ári rejisser Djeki Chan bastaǵan halyqaralyq kinojobanyń túsirilim tobymen kezdesti, dep habarlaidy ult.kz.
Kezdesý Memleket basshysynyń tapsyrmasy boiynsha ótti. Oǵan sheteldik jáne qazaqstandyq prodiýserler Esmond Ren, Rústem Omarov, Igor Tsai jáne Orynbasar Qudaibergenov qatysty.
Kezdesý barysynda Qazaqstandaǵy kinematografiia salasyndaǵy halyqaralyq yntymaqtastyqty damytý jáne birlesken kinojobalardy júzege asyrý máseleleri talqylandy.
Erlan Qarin Prezident Qasym-Jomart Toqaevtyń kreativti indýstriiany damytýǵa jáne azamattardyń shyǵarmashylyq áleýetin júzege asyrýyna jaǵdai jasaýǵa erekshe kóńil bólip otyrǵanyn atap ótti.
Onyń aitýynsha, iri halyqaralyq kinojobalardyń Qazaqstanda túsirilýi otandyq kinoindýstriianyń damýyna, jergilikti mamandardyń tájiribesin arttyrýǵa jáne eldiń halyqaralyq kinoóndiris úshin tartymdy alań retinde tanylýyna múmkindik beredi.
Kezdesýde kino salasyndaǵy jańa tehnologiialardy damytý máselesine de nazar aýdaryldy. Erlan Qarin biyl Astana qalasynda ótken Astana AI Film Festival týraly aitty. Festivalge álemniń 125 elinen 8 myń ótinim túsken.
Sońynda Vitse-Prezident Djeki Chanǵa Qazaqstanǵa degen erekshe yqylasy úshin alǵys aityp, halyqaralyq kinojobaǵa qatysýshylarǵa shyǵarmashylyq tabys tiledi.
