Almatyda renovatsiiaǵa túsetin úilerdiń onlain kartasy iske qosyldy. Endi qala turǵyndary óz úiiniń súrilýge jatatynyn internet arqyly teksere alady, dep habarlaidy ult.kz.
Karta «Almaty» ÁKK saityna ornalastyrylǵan. Korporatsiia renovatsiia baǵdarlamasynyń ákimshisi retinde nysandardy anyqtap, investorlardy irikteidi.
Úidiń renovatsiiaǵa kiretinin qalai tekserýge bolady?
Ol úshin:
- «Almaty» ÁKK saityna kirińiz;
- Izdeý jolaǵyna úidiń mekenjaiyn jazyńyz;
- «Tabý» batyrmasyn basyńyz.
Almatyda qandai úiler súriledi?
Almatydaǵy renovatsiia baǵdarlamasy 2024 jyly qabyldanyp, 2030 jylǵa deiin júzege asyrylady. Baǵdarlama aiasynda eskirgen turǵyn úilerdi súrip, olardyń ornyna zamanaýi turǵyn úi keshenderi men qajetti infraqurylym salý josparlanǵan.
2030 jylǵa deiin 1403 eski úidi súrip, shamamen 7500 menshik iesin jańa baspanaǵa kóshirý kózdelgen.
Qazir qalada jekelegen eski úilerdi ǵana emes, kvartaldardy keshendi jańartý tásiline kóship jatyr. Onyń aiasynda eski kópqabatty jáne jeke úiler, qajet bolǵan jaǵdaida kommertsiialyq nysandar da súrilýi múmkin.
Qazirgi ýaqytta Almatynyń ártúrli aýdandaryndaǵy birneshe kvartaldy salýǵa investorlar izdestirilip jatyr. Olardyń qatarynda júzdegen jeke úi bar.
Turǵyndarǵa ne beriledi?
Eski úidiń ielerine «bólmege-bólme» qaǵidaty boiynsha jańa baspana nemese naryqtyq qunyna sai aqshalai ótemaqy beriledi.
Al kommertsiialyq jáne turǵyn emes nysandardyń ielerine de ótemaqy nemese quny men sipattamasy jaǵynan teń nysan usynylady.
