Kókshetaý turǵyny shetelge jumysqa ornalastyrýdy ýáde etip, 92 azamattan shamamen 70 mln teńge alǵan. Ol alaiaqtyq jasaǵany úshin sottaldy, dep habarlaidy ult.kz.
Aqmola oblystyq sotynyń málimetinshe, jeke kásipker 2024 jyldan bastap azamattarǵa shetelde jumysqa ornalasýǵa qajetti qujattardy rásimdeý qyzmetin usynǵan. Ol áleýmettik jelide ózin bloger retinde tanystyryp, Angliiaǵa jumysqa ornalastyrý, viza men meditsinalyq saqtandyrý rásimdeý jáne ushý ýaqytyn uiymdastyrýǵa ýáde bergen.
Alaida aqshany alǵannan keiin mindettemelerin oryndamaǵan. Klientterden bailanysyn úzgen, kezdesýlerden qashyp, qońyraýlarǵa jaýap bermegen.
Tergeý málimetinshe, kúdikti Kókshetaý, Astana jáne Qaraǵandy qalalarynan, sondai-aq Aqmola, Qaraǵandy, Qostanai, Soltústik Qazaqstan jáne Qyzylorda oblystarynan 92 azamattyń jalpy somasy shamamen 70 mln teńgesin iemdengen. Ár adamnan 250 myńnan 1 mln teńgege deiin aqsha alǵan.
Sot úkimimen oǵan 6 jyl 8 aiǵa bas bostandyǵynan aiyrý jazasy taǵaiyndaldy. Sonymen qatar bes jyl boiy azamattardyń aqshasyn kommertsiialyq jáne ózge de qyzmetke tartýǵa bailanysty qyzmetpen ainalysý quqyǵynan aiyryldy.
Alaida sottalýshynyń kámeletke tolmaǵan eki balasy bar ekeni eskerilip, bas bostandyǵynan aiyrý jazasyn óteý bir jylǵa keiinge qaldyryldy.
Sot 28 jábirlenýshiniń azamattyq talaptaryn qanaǵattandyryp, olarǵa keltirilgen materialdyq zalaldy óndirý týraly sheshim shyǵardy. Ótemaqy mólsheri ár jábirlenýshi úshin 200 myń teńgeden 1 million teńgeden astam somaǵa deiin jetedi.
Sot úkimi ázirge zańdy kúshine engen joq.
