Көкшетау тұрғыны шетелге жұмысқа орналастыруды уәде етіп, 92 азаматтан шамамен 70 млн теңге алған. Ол алаяқтық жасағаны үшін сотталды, деп хабарлайды ult.kz.
Ақмола облыстық сотының мәліметінше, жеке кәсіпкер 2024 жылдан бастап азаматтарға шетелде жұмысқа орналасуға қажетті құжаттарды рәсімдеу қызметін ұсынған. Ол әлеуметтік желіде өзін блогер ретінде таныстырып, Англияға жұмысқа орналастыру, виза мен медициналық сақтандыру рәсімдеу және ұшу уақытын ұйымдастыруға уәде берген.
Алайда ақшаны алғаннан кейін міндеттемелерін орындамаған. Клиенттерден байланысын үзген, кездесулерден қашып, қоңырауларға жауап бермеген.
Тергеу мәліметінше, күдікті Көкшетау, Астана және Қарағанды қалаларынан, сондай-ақ Ақмола, Қарағанды, Қостанай, Солтүстік Қазақстан және Қызылорда облыстарынан 92 азаматтың жалпы сомасы шамамен 70 млн теңгесін иемденген. Әр адамнан 250 мыңнан 1 млн теңгеге дейін ақша алған.
Сот үкімімен оған 6 жыл 8 айға бас бостандығынан айыру жазасы тағайындалды. Сонымен қатар бес жыл бойы азаматтардың ақшасын коммерциялық және өзге де қызметке тартуға байланысты қызметпен айналысу құқығынан айырылды.
Алайда сотталушының кәмелетке толмаған екі баласы бар екені ескеріліп, бас бостандығынан айыру жазасын өтеу бір жылға кейінге қалдырылды.
Сот 28 жәбірленушінің азаматтық талаптарын қанағаттандырып, оларға келтірілген материалдық залалды өндіру туралы шешім шығарды. Өтемақы мөлшері әр жәбірленуші үшін 200 мың теңгеден 1 миллион теңгеден астам сомаға дейін жетеді.
Сот үкімі әзірге заңды күшіне енген жоқ.
