Shymkentte erkin kúresten sport sheberi, 40 jastaǵy Vasilii Kolesnikovtyń ólimine qatysty qylmystyq is boiynsha sot jaryssózi bastaldy. Memlekettik aiyptaýshy alty sottalýshyǵa 22 jyldan 24 jylǵa deiin bas bostandyǵynan aiyrý jazasyn surady, dep habarlaidy ult.kz.
Jetinshi arnanyń málimetinshe, qaiǵyly oqiǵa biyl qańtarda bolǵan. Tergeý nusqasyna sáikes, kóshedegi jol-kólik oqiǵasy men tóbelesten keiin Kolesnikov urlanyp, keiin óltirilgen.
Is boiynsha Maqsut Arysbaev, Álihan Erimbet, Raýan Ińkárbekov, Darhan Qyzbalaev, Bekasyl Jumanazar jáne Jandildá Qýandyqov sot aldynda jaýap berip jatyr. Taǵy bir kúdikti Marat Dáýlasov halyqaralyq izdeýde. Al boljamdy qatysýshylardyń biriniń jeke basy ázirge anyqtalmaǵan.
Prokýror sottalýshylardy aldyn ala sóz bailasý arqyly adam óltirý, adam óltirýge oqtalý, adam urlaý jáne buzaqylyq boiynsha kináli dep tanýdy surady. Sonymen qatar jábirlenýshi tarapqa moraldyq shyǵyn retinde 10 million teńgeden tóleýdi talap etti.
Iste Kolesnikovpen birge kólikte bolǵan Maqsat Kóshkinbaevqa jasalǵan shabýyl da qaralyp jatyr. Ol joldaǵy tóbeles kezinde aýyr jaraqat alǵan.
Alty sottalýshy men olardyń advokattary adam óltirý jáne adam óltirýge oqtalý týraly aiyptardy moiyndamaidy. Qorǵaý tarapynyń aitýynsha, Kolesnikovty naqty kim óltirgenin dáleldeitin jetkilikti aiǵaq joq, sondyqtan bul aiyptar boljamǵa negizdelgen. Olar osy baptar boiynsha sottalýshylardy aqtaýdy surady.
