Koronavirýs halqymyzǵa ǵana emes, memlekettik bilik institýttary men biznes úshin de aýyr synaqqa ainaldy - Mamin

QR Premer-Ministri Asqar Mamin qazaqstandyqtardy Jańa jylmen quttyqtady, dep habarlaidy "Ult aqparat" Úkimettiń baspasóz qyzmetine silteme jasap.

*** 

Qurmetti qazaqstandyqtar, barshańyzdy Jańa 2021 jylmen shyn júrekten quttyqtaimyn! Jańa jyl – ótken jyldy qorytyndylap, tabaldyryqtan endi attaǵan jylǵa jospar qurýǵa jeteleitin shýaqty mereke. 

Adamdardyń kúndelikti ómiri men ekonomikaǵa aitarlyqtai keri áserin tigizgen 2020 jyl búkil álem elderimen birge bizdiń elimiz úshin de qiyn-qystaý kezeń boldy. Koronavirýs pandemiiasy halqymyzǵa ǵana emes, memlekettik bilik institýttary men biznes úshin de aýyr synaqqa ainaldy. 2020 jyly qazaqstandyqtar qaýipti indetpen bel sheshe kúresip qana qoimai, onyń elimizdiń áleýmettik-ekonomikalyq damýyna áserin barynsha azaitý boiynsha aýqymdy jumys júrgizdi. Nátijesinde, Qazaqstan ulttyq ekonomikasynyń turaqtylyǵy men damýynyń zor áleýetin kórsete otyryp, qiyndyqtardyń barlyǵyn laiyqty eńsere bildi. 

Biyl da aldymyzda elimizdiń áleýmettik-ekonomikalyq damýyn, qazaqstandyqtardyń ál-aýqaty men ómir súrý sapasyn arttyrý boiynsha aýqymdy ister kútip tur. Óz kúshimizge degen senimdilik, ynta men jaýapkershilik, almaǵaiyp álemdegi ózgerister lebinen qalys qalmaý, jańa quzyretterdi igerý, eńbeksúigishtik pen tabandylyq bizdiń oiǵa alǵan josparlarymyzdy iske asyryp, maqsat-muratymyzǵa jetkizetinine senimdimin! 

Qazaqstandyqtarǵa shyn júregimnen myqty densaýlyq, senim men sáttilik tileimin! Shýaqty mereke ár otbasyna jylylyq pen qut-bereke syilasyn!