Ótken táýlikte Qazaqstanda koronavirýs infektsiiasy PTR testimen dáleldengen 1 548 adam tirkeldi. "Qyzyl aimaqta" turǵan astanada eń kóp naýqas – 235 adam tirkeýge alynǵan. Qalany qorshap jatqan Aqmola oblysynda Covid juqtyrǵan 209 kisi sanaqqa kirdi.
Qazaqstannyń eń úlken qalasy – Almatyda koronavirýs infektsiiasy 130 adamǵa juqqan.
Reseimen shektesetin birneshe aimaqta indet órship tur. Qaýpi boiynsha "qyzyl aimaqqa" jatqyzylǵan Pavlodar oblysynda 226, Qostanaida – 170, Soltústik Qazaqstanda – 116, Atyraýda – 104, Batys Qazaqstanda – 74, Shyǵys Qazaqstanda – 52 naýqas tirkeldi.
Almaty oblysynda – 83, Qaraǵandy oblysynda – 78, Jambylda – 27, Mańǵystaý, Aqtóbe jáne Túrkistan oblystarynda 11 naýqastan, Shymkentte – 8, Qyzylorda oblysynda – 3 adam koronavirýspen tirkeldi.
Ótken táýlikte indetten 9 adam qaitys boldy.
Qazir 25 983 adam koronovirýs infektsiiasy men soǵan uqsas pnevmoniiadan (14 277 KVI+ jáne 11 706 KVI-) em alyp jatyr, olardyń ishinde 6 723 naýqas statsionarda. 302 adamnyń jaǵdaiy aýyr, 49 kisiniń jaǵdaiy óte aýyr, al 39 kisi ókpe jeldetkish apparatqa qosylǵan.
Resmi málimet boiynsha, ótken jyldyń 13 naýryzynan beri elde 175 390 adam koronavirýs infektsiiasyn juqtyrǵan. Buǵan "koronavirýsqa uqsas pnevmoniia" deregi kirmeidi, Qazaqstannyń densaýlyq saqtaý ministrligi mundai naýqastardy tamyz aiynan beri bólek sanap keledi. Byltyr jazdyń alǵashqy eki aiynda elde koronavirýs testi keri nátije berse de, simptomdary soǵan keletin "túsiniksiz" pnevmoniia indeti qatty órship, buǵan Dúniejúzilik densaýlyq saqtaý uiymy men halyqaralyq aqparat quraldary nazar aýdarǵan.
Densaýlyq saqtaý ministrliginiń málimeti boiynsha, "koronavirýsqa uqsas pnevmoniiamen" osy kúnge deiin 47 311 adam tirkeýge alynǵan, 550 kisi osy naýqastan kóz jumǵan. Resmi málimet boiynsha, koronavirýstyń ózinen osyǵan deiin 2 457 kisi qaitys bolǵan. Biraq kei sarapshylar men dárigerler indetten ólgender sany budan áldeqaida kóp dep topshylaidy.
Densaýlyq saqtaý ministrligi koronavirýs pen "soǵan uqsas pnevmoniia" deregin bólek jariialaidy. Al Amerikadaǵy Djons Hopkins ýniversiteti Qazaqstan bergen eki derekti qosyp, elde 222 myńnan astam adam Covid-pen tirkeldi, 2,9 kisi qaitys boldy dep kórsetken.
Jalpy álemde koronavirýs juqtyrǵandar sany 100 millionǵa taiap qaldy. 2,1 milliondai kisi osy dertten kóz jumdy.
