Koronovirýs indetine bailanysty «Qorǵas» ortalyǵyn jabý merzimi taǵy da uzartyldy. Qytaidyń taýary saýdalanatyn jer endi aqpannyń sońyna deiin istemeidi, dep habarlaidy "Ult aqparat".
«Buǵan deiin habarlaǵanymyzdai, «Qorǵas» halyqaralyq shekara mańy yntymaqtastyq ortalyǵy koronavirýstyń aldyn alý maqsatynda 15 aqpanǵa deiin jabyldy. Osy jaitqa bailanysty endi ýaqyt merzimi aqpannyń sońyna deiin uzartyldy.
Aita ketý kerek, Almaty oblysynyń ákimi Amandyq Batalovtyń tapsyrmasyna sáikes bul ýaqyt aralyǵynda «Qorǵas» HShYO-nyń ǵimaratyna jóndeý jumystary júrgiziledi. Barlyǵyna belgili, ol jerde biraz problemalar bar. Turǵyndar halyqtyń kóptigi saldarynan, keptelis týyndap, túrli qiyndyqtarǵa tap bolatynyn aitqan edi. Qazir «Qorǵas» ortalyǵynyń jańa basshysynyń aldynda ótkeldi jańǵyrtý tapsyrmasy tur», - dedi Almaty oblysy ákiminiń baspasóz hatshysy Ǵalymurat Júkel.
Esterińizge sala keteiik, buǵan deiin «Qorǵas» ortalyǵynyń 15 aqpanǵa deiin jumysyn ýaqytsha toqtatqanyn habarlaǵan bolatynbyz.
