Áskeri politsiia qyzmetkerleri Qorǵanys ministrligi ǵimaratynyń ústinde zańsyz ushyp júrgen kvadrokopterdi anyqtady, dep habarlaidy vedomstvonyń baspasóz qyzmeti.
«Sońǵy ýaqytta Qazaqstan Respýblikasy Qorǵanys ministrligi nysandarynyń ústinen pilotsyz ushatyn apparattardyń ushý jaǵdailary kóbeiip ketti. Olardyń bári de ýaqtyly anyqtalyp jatyr. Osy jyldyń 31 naýryzynda Nur-Sultan qalasynda Áskeri politsiia otriadynyń áskeri qyzmekshileri Qazaqstan Respýblikasy Qorǵanys ministrligi nysanynyń ústinen pilotsyz ushatyn apparattyń - kvadrokopterdiń ushyp júrgenin anyqtady», - dedi Qorǵanys ministrliginiń baspasóz qyzmeti.
Jedel áreket toby osyǵan qatysty eki azamatty ustap, qalalyq Politsiia departamentine tapsyrǵan.
«Osyǵan bailanysty Qorǵanys ministrligi áskeri nysandardyń ústinen BPLA-nyń (kvadrokopter) ushýy - Qazaqstan Respýblikasynyń «QR áýe keńistigin qoldaný jáne aviatsiia qyzmeti týraly» zańynyń 31 jáne 33 baptaryna qaishy keletinin eskertedi. Atalǵan normalardy buzǵany úshin ákimshilik jaýapkershilik qarastyrylǵan. Ol úshin jeke tulǵalarǵa 10 AEK, laýazymdy tulǵalarǵa 20 AEK kóleminde aiyppul salynady», - delingen habarlamada.
Atalǵan fakt boiynsha tergeý amaldary júrip jatyr. Bul týraly QR Qorǵanys ministriniń orynbasary Talǵat Muhtarov aitty.
«Rejimdik nysandar, iaǵni ministrlik, áskeri bilimder aýmaǵynda osyndai ruqsat etilmegen is-qimyldarǵa tyiym salynǵan. Sáikesinshe, olarǵa tosqaýyl qoiylady jáne ondai apparattardyń ushýyna jol berilmeidi. Al osyndai qadamǵa barǵandarǵa qatysty qazirgi kezde tiisti organdar tekserý amaldaryn júrgizip jatyr», - dedi T. Muhtarov Parlament Májilisinde tilshilerdiń saýalyna jaýap bere otyryp.
Kvadrokopterdi qoldaný tártibi QR Indýstriia jáne infraqurylymdyq damý ministrliginiń resmi saitynda jariialanǵan.
