- Búgin QR Prezidenti Nursultan Nazarbaev Koreia Respýblikasyna memlekettik sapary aiasynda atalǵan eldiń Prezidenti Pak Kyn Hemen keńeitilgen quramda kelissóz júrgizdi, dep habarlaidy QazAqparattyń arnaýly tilshisi Seýlden.
Kelissózder barysynda taraptar eki eldiń arasyndaǵy saiasi, saýda-ekonomikalyq, mádeni-gýmanitarlyq máselelerge qatysty jaittardy keńinen talqyǵa saldy.
Sondai-aq halyqaralyq kún tártibindegi ózekti máseleler qozǵalyp, iadrolyq qarýsyzdaný problemasy kóterildi. Aita keterligi, Koreia kórshiles Soltústik Koreianyń iadrolyq qarý baǵdarlamasyna bailanysty alańdaýshylyq tanytyp otyrǵany belgili. Sondyqtan da Koreia Qazaqstan 2017-2018 jyldary aralyǵynda Birikken Ulttar Uiymy Qaýipsizdik keńesine turaqty emes múshe bolǵanda iadrolyq qarýsyzdaný jáne taratpaý isine belsene aralasýǵa niet tanytyp otyr.
Munan bólek, taraptar kiberqaýipsizdik, energetikalyq yntymaqtastyq máselelerin de qozǵady. Bul rette Koreia Batys Qazaqstan oblysynda gaz kondensatyn qaita óńdeitin birlesken kásiporyn qurýǵa qulshynys tanytýda. Saýda-ekonomikalyq saladaǵy bailanystardy nyǵaityp, eki el arasyndaǵy osydan eki jyl burynǵy álemdik daǵdarysqa bailanysty tómendegen taýar ainalymynyń kólemin arttyrý jaiy da qozǵaldy.
Kelissózder barysynda qozǵalǵan taǵy bir baǵyt meditsina týrizmi salasy boldy. Bul oraida Koreia tarapynyń Qazaqstanda arnaiy meditsinalyq ortalyq ashýǵa da nieti bar. Atalǵan ortalyq elimizde ashylǵan jaǵdaida búginde korei eline baryp em alatyn qazaqstandyqtardyń óz jerinde júrip-aq sapaly meditsinalyq kómek alýyn múmkindik týmaq.
Prezidentter 2017 jyly elordamyz Astanada ótetin EKSPO kórmesine korei tarapynyń qatysýyn da talqyǵa saldy. Kezdesý qorytyndysynda Qazaqstan men Koreia basshylary strategiialyq seriktestik qarym-qatynasty odan ary tereńdetý týraly birlesken málimdemege qol qoidy.
.jpeg)