Ishki ister ministri Erlan Turǵymbaev Qordaidaǵy janjal boiynsha 47 adamnyń ustalǵanyn málimdedi, dep habarlaidy QazAqparat.
«Qazirgi ýaqytta 47 adam ustalyp, politsiia bólimine jetkizildi. Olardan eki ańshy qarýy tárkilendi. QR Qylmystyq kodeksiniń 272-baby (jappai tártipsizdikti uiymdastyrý jáne soǵan qatysý) jáne 99-baby (kisi óltirý) boiynsha sotqa deiingi tergeý amaldary júrgizilip jatyr. Qoǵamdyq tártipti buzǵandardyń bári de zańǵa sáikes jaýapkershilikke tartylady. Qoǵamdyq tártipti qadaǵalaý maqsatynda oqiǵa ornynda qazirgi ýaqytta politsiia qyzmetkerleri men Ulttyq ulan sarbazdary jumyldyrylǵan», - dedi Erlan Turǵymbaev OKQ-da ótken baspasóz máslihatynda.
Eske sala ketsek, buǵan deiin Erlan Turǵymbaev Qordaidaǵy oqiǵa saldarynan 8 adamny kóz jumǵanyn málim etken edi.
«7 aqpanda saǵat 19.00-de Jambyl oblysynyń Politsiia departamentiniń kezekshi bólimine Qordai aýdany Masanchi aýylynda 70-ten astam adam tóbelesip jatyr degen habarlama kelip tústi. Zańsyz áreketterdi toqtatý úshin oqiǵa ornyna dereý politsiia qyzmetkerleri jiberildi. Sol jerde bolǵan adamdar tóbelesti videoǵa túsirip, áleýmettik jeli arqyly taratqan. Osynyń saldarynan basqa aýyldardan kelgen 300-den astam azamat tóbeleske qosylyp ketken. Eki jaq bir-birine tas laqtyryp, taiaqpen uryp, qarý qoldandy. 8 adam kóz jumdy. 40-tan astam adam jaraqat aldy», - dedi Ishki ister ministri OKQ-da ótken baspasóz máslihatynda.
Buǵan deiin Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles bolǵanyn habarlaǵan bolatynbyz.
Kóp ýaqyt ótpei Prezident Qasym-Jomart Toqaev osy oqiǵaǵa qatysty pikir bildirdi.
«Jambyl oblysy Qordai aýdanynda buzaqylyq sipattaǵy jappai tóbeles boldy. Ony arandatýshylar óz paidasyna qoldanbaq bolǵan. Politsiia jaǵdaidy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady», dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqiǵaǵa bailanysty málimdeme jasady.
