Biz túk te ózgermeppiz.
Ózimizdi ózgertýge asa qulyqty da emes ekenbiz.
Bireý kelip quldyq qamytty moinymyzdan alyp tastaidy. Biz qaitadan baryp soǵan basymyzdy tyǵa beredi ekenbiz. Óitkeni, moinymyz qamytqa ábden úirengen. Qoǵamnyń basy tabytqa jetkenshe qalmaityn netken berik qamyt bul?
«Soqyr taýyq kórgeninen jazbaidy» degen bar. Bizdiń de bar kórgenimiz KSRO, kóksegenimiz de KSRO. Basqany kinálap keregi joq. Bar pále ózimizde. Dálel izdep alysqa barýdyń qajeti shamaly.
27 qazan kúni Atyraýdaǵy «Munaishy» stadionynda KSRO fýtbol quramasynyń ardagerleri men munaily óńirdegi ardager-fýtbolshylardyń joldastyq kezdesýi ótti.
Birinshi taimda orys oiynshylary bes dop saldy. Atyraý baspasózi «kezinde álemdik dop dodasynda Odaqtyń namysyn qorǵaǵan sheberlerge qarsy turý atyraýlyq ardager-fýtbolshylarǵa ońaiǵa túsken joq», dep jazdy. Aqyry 6:2 esebimen KSRO-nyń ardager-fýtbolshylary jeńiske jetti.
«KSRO-nyń ardager-fýtbolshylarynyń quramynda qaqpashy Rinat Dasaev, Oleg Romantsev, Igor Belanov, Vagiz Hidiiatýllin, Iýrii Kovtýn, Valerii Kechinov, Iýrii Gavrilov, Valerii Shmarov syndy álemge áigili sheberler oinady», degen aqparatty oqyp otyryp oiǵa qalasyz. Qartaisa da qatardan qalmaityn netken myqtylar bular? «Álemge áigili» dep dabyraitatyn biz ǵana. Kez kelgen sheteldikten surap kórińizshi, osy atalǵan fýtbolshynyń bireýin de bilmeidi.
Osy fýtbol ardagerleri dep áspettep otyrǵan adamdar birese Atyraýda, birese Almatyda, endi birde Astanada joldastyq kezdesýler ótkizip jatady. Ne úshin? Qandai qarjyǵa?
«Sol kezdegi fýtboldy saǵynǵanymyz» úshin be? Joq, bizdiń qazaqtar fýtboldy emes, KSRO-ny saǵynady. Úiinde jatqan reseilik zeinetkerler aqshasyn tólep, astyna tai, aldyna mai tosyp, bireýler óbektep jatsa nesi ketedi? Keledi. Ishedi. Jeidi. Ketedi. Al solardan ne úirendik? Qazaqstan fýtboly KSRO deńgeiine qarap ósetin bolsa, jetisken ekenbiz. Nege álemge áigili Pele kelip, bizben fýtbol oinamaidy? Óitkeni, ol munyń uiat ekenin biledi.
Tek fýtbol emes, qazirgi tańda Qazaqstan arnalaryn da KSRO elesi kezip júr. ORT arnasy sonyń aiqyn dáleli. Reseidiń «merzimi ótken» juldyzdary Qazaqstan aspanyn «jaýlap alýǵa» asyǵady. Jaiylyp jastyq, iilip tósek bolatyn mundai eldi olar álemniń basqa jerinen itpen izdese de taba alar ma eken?
Bolat pen balǵadan jasalǵan KSRO kóilegi kónermeidi eken. Eshbir el ol kóilekti qaita kigisi kelmeidi. Siresip júrgisi kelmeidi. Tek bizdiń el ǵana óz erkimen KSRO kóilegin ústinen tastaǵysy kelmeidi.
«Erkimen» degendi sál artyq aitqan siiaqtymyz. Qulda erik bolmaidy eken ǵoi!
Nurtóre Júsiptiń feisbýktaǵy jazbasynan
