Astanadaǵy balalardy ońaltý ortalyǵyna konditerlik ónim jetkizgen kásiporynǵa 350 myń teńge aiyppul salyndy, dep habarlaidy QazAqparat.
Bul týraly Nur-Sultan qalasynyń sanitariialyq-epidemiologiialyq baqylaý departamentiniń baspasóz qyzmeti habarlady.
«Nur-Sultan qalasynyń sanitariialyq-epidemiologiialyq baqylaý departamenti «University Medical Center» korporativtik qorynyń Balalardy ońaltý ulttyq ortalyǵynda konditerlik ónimnen bógde material (tyshqan) shyqqanyna bailanysty atalǵan ónimdi óndirýshi men jetkizýshiniń ústinen jospardan tys tekserý júrgizilgenin habarlaidy.
Tekserý kezinde unnan jasalǵan konditerlik ónimderdi óndirý tsehy tiisti oryndarǵa óziniń qyzmetin bastaǵany týraly habarlamastan qyzmetin júzege asyrǵandyǵy anyqtaldy. Sanitariialyq qaǵida talaptarynyń, onyń ishinde tamaq ónimderin óndirýdiń tehnologiialyq protsesi boiynsha birqatar buzýshylyqtar anyqtaldy», - delingen departamenttiń dereginde.
Departament mamandary anyqtaǵan zańsyzdyqtar boiynsha kásipkerlik nysan Ákimshilik quqyq buzý kodeksindegi 425-baptyń 1-bóligi boiynsha 352 245 teńge kóleminde aiyppul tóleitin boldy. Al kásiporynnyń qyzmetin bastaǵany týraly habarlamaǵany týraly materialdar Ákimshilik quqyq buzý kodeksiniń 463-babynyń 1-bóligi boiynsha sotqa jiberilip, sanitariialyq nusqama berilgen.
«QR Saýda jáne integratsiia ministrligi Tehnikalyq retteý jáne metrologiia komitetiniń Nur-Sultan qalasy boiynsha departamentine óndiriletin ónimge sáikestik týraly berilgen deklaratsiianyń zańdylyǵyn anyqtaý jáne onyń kúshin joiý týraly máseleni qaraý jóninde hat joldandy.
Departament biznes sýbektilerine aýtsorsingtik kompaniialar men tamaq ónimderin jetkizýshilerdi tańdaýda muqiiat bolýdy usynady. Qajet bolsa, obektige baryp, onyń durys sanitarlyq jaǵdaiyna kóz jetkizgen jón. Bul bolashaqta osyndai jaǵdailardy jáne tamaqtan ýlaný qaýpin boldyrmaýǵa kómektesedi», - dep jazylǵan resmi aqparatta.
