Qazaq-qytai birlesken kinojobasy - «Kompozitor» kórkem filmi IX halyqaralyq Beijiń kinofestivaliniń negizgi konkýrstyq baǵdarlamasyna qatysady (The 9th Beijing International Film Festival), dep habarlaidy "Ult aqparat" «Qazaqfilm» kinostýdiiasyna silteme jasap.
Atalǵan festival 13-20 sáýir aralyǵynda Qytai astanasynda ótedi. QHR negizi qalanýynyń 70-jyl tolýyna orai kinofestivaldiń biylǵy taqyryby «Otan» dep atalady.
Kórkem lenta qytailyq kompozitor Si Sinhaidyń Keńes odaǵy kezinde Almatyǵa evakýatsiialanǵan kezi jáne onyń qazaq kompozitory Baqytjan Baiqadamovpen dostyǵy týraly baiandaidy. Filmdi Sh.Aimanov atyndaǵy «Qazaqfilm» kinostýdiiasy jáne qytailyq «Shineworks Pictures», «China film coproduction corporation» kompaniialary túsirgen.
Baqytjan Baiqadamovtyń obrazyn tanymal qazaqstandyq akter Berik Aitjanov somdaǵan. Al Si Sinhaidy qytailyq akter Hý Chjýn oinaidy. Sonymen qatar, kartinada basqa da otandyq akterler boi kórsetedi - Altynai Nógerbek, Arýjan Jazylbekova, Sergei Ýfimtsev jáne basqalar. Qoiýshy rejisseri - Sherzat Iakýb, so-rejisseri - Sábit Qurmanbekov.
«Kompozitor» filmi Beijiń kinofestivalinde basty júldege - Tiantan («Aspan ǵibadathanasy») syilyǵyna iriktelip alynǵan álemniń 14 filmmen qatar baq synaidy.
Tiantan Award júldesiniń Halyqaralyq qazylar alqasy tanymal kinematografisterden quralǵan. Olar júldelerdi on nominatsiia - úzdik kórkem film, úzdik rejissýra, akterlik sheberlik (sonymen qatar ekinshi plandaǵy akter), úzdik stsenarii, úzdik mýzyka jáne vizýaldy effektiler boiynsha tabystaidy. Qazylar alqasyna «Arystan patsha» animatsiialyq filmi boiynsha tanylǵan, amerikalyq rejisser jáne prodiýser Rob Minkoff tóraǵalyq etetin bolady.
Halyqaralyq kinofestival Beijiń qalasy ákimshiliginiń qoldaýymen 2011 jyldan bastap jyl saiyn ótip keledi. Tiantan Award-2019 premiiasynyń jeńimpazdary 2019 jyldyń 20 sáýir kúni kinofestivaldiń jabylý saltanatynda belgili bolmaq.
Esterińizge sala keteiik, «Kompozitor» filminiń óndirisi úkimet deńgeiinde uiymdastyrylǵan bolatyn. 2015 jyly 31 tamyzda QR Tuńǵysh Prezidenti - Elbasy Nursultan Nazarbaev jáne Qytai Halyq Respýblikasynyń Tóraǵasy Si Tszinpinniń qatysýymen ótken mádeni-gýmanitarlyq yntymaqtastyq týraly kelisimge qol qoiylǵan kezde ýaǵdalastyq etilgen. QR Mádeniet jáne sport ministrliginiń usynysy boiynsha Sh.Aimanov atyndaǵy «Qazaqfilm» AQ men qytailyq Shineworks Pictures kompaniiasy arasynda atalǵan filmdi birlese óndirý, qarjylandyrý, jáne paidalaný jóninde kelisimge otyrǵan.
2017 jyly 8 maýsymda QHR Tóraǵasy Si Tszinpinniń Qazaqstanǵa jasaǵan sapary aiasynda qol qoiylǵan birlesip kinoóndiristi júrgizý týraly memleketaralyq kelisim negizinde atalǵan kinojoba iske asqan bolatyn.
Kartinanyń túsirilimderi 2017 jyly ótip, filmniń biraz bóligi Qazaqstanda júrgizildi.
