Búgin Astanada QR Premer-Ministriniń orynbasary – QR Aýyl sharýashylyǵy ministri A.Myrzahmetovtyń tóraǵalyǵymen ótken Jer reformasy boiynsha komissiianyń kezekti otyrysynda osy baǵyttaǵy buǵan deiin atqarylǵan jumystardyń qorytyndylary tujyrymdaldy.
Elbasy tapsyrmasyna sáikes Komissiia músheleriniń Astanadaǵy 4 otyrysy men Aqmola, Almaty, Qyzylorda jáne Atyraý oblystarynda jergilikti turǵyndarmen ótkizilgen kezdesýlerdiń nátijesi men usynystar eskerilip, sondai-aq, jer reformasy boiynsha bastamashyl azamattarmen talqylaý júrgizýde suraqtar men usynystardyń qaitalanýy nazarǵa alynyp, tómendegidei sheshimder qabyldandy.
Birinshiden, aýyl sharýashylyǵy jerlerin Qazaqstan Respýblikasy jeke jáne zańdy tulǵalarǵa, iaǵni, qazaqstandyqtarǵa 49 jylǵa deiingi merzimge jalǵa berý institýtyn saqtaý usynyldy. Bul rette zańnamalyq normalar arqyly:
- turaqty monitoring (jalǵa alýdyń alǵashqy 5 jylynda – jyl saiyn, odan keiingi kezeńderde sýarmaly egistikterde ár 3 jyl saiyn, tálimi jerlerde ár 5 jyl saiyn) júrgizý arqyly jer paidalanýshylardyń jerdi utymdy paidalanýyna jáne ózine berilgen mindettemelerdi oryndaýyna baqylaýdy kúsheitý;
- Jer kodeksinde aýyl sharýashylyǵy jerlerin berýdiń jeke jáne egjei-tegjeili reglamentteitin tártibin belgileý;
- aýyl sharýashylyǵy jerlerin berý jónindegi konkýrstardyń ashyqtyǵyn qamtamasyz etý úshin konkýrs komissiiasynyń quramyna qoǵamdyq keńester men birlestikterdiń ókilderin qosý;
- ákimdikterdiń aýyl sharýashylyǵy jerlerin berý jónindegi naqty is-qimyldary tártibin belgileitin konkýrs ótkizý qaǵidalaryn ázirleý;
- jalǵa berý merzimin biznes-josparǵa sáikes investitsiialar kólemine qarai aiqyndaý. Jaldaý merzimin uzartý týraly sheshimdi qoǵamdyq keńester men birlestikterdiń qatysýymen, jerdi paidalaný monitoringiniń jáne jaldaý shartynyń talaptaryn tiisinshe oryndalýynyń nátijeleri boiynsha qabyldaý qajettiligin aiqyndaý;
- jer paidalanýshylardyń mindetteri men jaýapkershiligin naqtylai jáne kúsheite otyryp, aýyl sharýashylyǵy jerlerin jalǵa berýdiń úlgilik shartyn ázirlep bekitý;
- aýyl sharýashylyǵy jerlerin tiimdi paidalanýdyń talaptaryn kúsheitý.
Ekinshiden, qazaqstandyqtarǵa jalǵa beriletin aýyl sharýashylyǵy jerleriniń shekti (eń joǵary) mólsherlerin belgileý usynyldy.
Úshinshiden, shekara mańy aýmaqtaryndaǵy aýyl sharýashylyǵy jerleriniń memlekettik shekaradan radiýsyn aiqyndai otyryp, jergilikti jaǵdailarǵa jáne óńirdiń erekshelikterine bailanysty olardy berý jónindegi talaptaryn anyqtap, bekitý usynyldy.
Tórtinshiden, halyqtyń qosalqy sharýashylyqtar muqtajdyqtaryn qanaǵattandyrý úshin eldi mekenderdiń ainalasyndaǵy jaiylymdar men shabyndyqtardyń alańdary aiqyndalyp, ol jekelerdi Qazaqstan Respýblikasy jeke jáne zańdy tulǵalaryna berýge tyiym salý usynyldy. Iaǵni, jergilikti turǵyndardy jaiylymdar jáne shabyndyqpen qamtamasyz etý maqsatynda, osyndai alqaptar memlekettik muqtajdyqtarǵa alýǵa jatqyzý kerek.
Besinshiden, jer reformasy sheńberinde keńinen talqylanyp otyrǵan jerdi jeke turǵyn úi qurylysy úshin berýdiń problemalyq máselelerin eskere otyryp, ákimdikterge JTQ-ǵa arnalǵan jer ýchaskelerin memleket muqtajdyqtaryna satyp alý múmkindigin berý úshin JTQ beriletin jerler memlekettik muqtajdyqtarǵa jatqyzý usynyldy. Iaǵni, 10 sotyq alýǵa kezekte turǵan azamattar sanynyń millionnan asqany óz aldyna, oblys ortalyqtary men iri qalalarda infraqurylymmen qamtamasyz etilgen bos jerlerdiń joqtyǵy máseleniń ótkir turǵanyn kórsetedi. Sońǵy shirekte Call-ortalyqtary men jerturaly.kz saityna kelip túsken usynystar men ótinishterdiń basym bóliginiń de osy máseleniń ainalasynda órbitini osy baǵytta jumystanýdy talap etedi.
Altynshydan, Komissiia múshelerimen qabyldanǵan aýyl sharýashylyǵy maqsatyndaǵy jerlerdi jalǵa berý institýtyn jetildirý boiynsha usynystary Qazaqstan Respýblikasy Parlamentine engizý usynyldy.
Jetinshiden, Aýyl sharýashylyǵy ministrligi jarǵylyq kapitalynda sheteldikterdiń úlesi bar birlesken kásiporyndarǵa aýyl sharýashylyǵy jerlerin jalǵa berý normalaryn da jariialanǵan moratoriige qosý jumystaryn atqarý usynyldy.
Segizinshiden, Aýyl sharýashylyǵy ministrligi Komissiia qabyldaǵan sheshimderdi zań talaptaryna sáikes rásimdep, Qazaqstan Respýblikasy Parlamentine engizý jumystaryn uiymdastyrý jáne jer zańnamasyn jetildirý jumysyn jalǵastyrý usynyldy.
Toǵyzynshydan, Jer kodeksinde moratorii jariialanǵan suraqtar boiynsha negizdelgen naqty sheshimder qabyldaý úshin aýyl sharýashylyǵy jerleriniń paidalanylýy týraly dáiekti málimetterdi tolyqtyrý, olarǵa egjei-tegjeili túgendeý jumystaryn júrgizý qajettiligin eskere otyryp, Qazaqstan Respýblikasy Prezidentine qoldanystaǵy moratoriidiń merzimin 5 jylǵa, iaǵni 2021 jyldyń 31 jeltoqsanyna deiin uzartý usynyldy.
Onynshydan, berilip otyrǵan usynystardy Qazaqstan Respýblikasy Prezidenti qabyldaǵan jaǵdaida Komissiia jumysyn toqtatý usynyldy. Iaǵni, Komissiia múshelerine jer zańnamasyn budan ári jetildirýge bailanysty jumysqa qyzyǵýshylyǵy bolatyn bolsa, onda Aýyl sharýashylyǵy ministrligimen birge bul jumysqa qatysa alatyndyǵy eskertildi.
Ult portaly
