Kólsai kólderi, Altyn Emel, Sharyn ulttyq parkterinde investordy anyqtaýǵa ashyq baiqaý jariialandy, dep habarlaidy QR Ekologiia, geologiia jáne tabiǵi resýrstar ministrliginiń baspasóz qyzmeti.
Almaty qalasynda «Kólsai Kólderi», «Altyn Emel» jáne Sharyn memlekettik ulttyq tabiǵi parkteriniń Qoǵamdyq keńesteri ekologiialyq týrizmdi damytýdyń Tujyrymdamalary boiynsha birlesken jinalys ótkizdi.
Sebebi ulttyq parkterdiń rekreatsiialyq aýmaqtaǵy jerlerinde ekotýrizmdi damytý maqsatynda, Erejege sáikes, tenderlik qujat jobasy aldyn ala talqylanyp, baiqaý ashyq jariialanýy tiis.
Jiyndy ashqan QR Ekologiia, geologiia jáne tabiǵi resýrstar ministriniń orynbasary Erlan Nysanbaev vedomstvo Prezident tapsyrmasy boiynsha ekotýrizmdi órkendetýdiń keshendi sharalaryn júzege asyryp jatqanyn aitty.
«Ekologiialyq týrizmdi damytýdyń Tujyrymdamalary tanystyrylyp, qoǵammen maquldandy. Osyǵan bailanysty qabyldanǵan Tujyrymdamaǵa sáikes, parkterdiń Bas josparlarynyń ekotýrizm infraqurylymyna qatysty jerlerine ózgeris engizildi»,- dedi vitse-ministr.
Úsh ulttyq parktiń basshylary Tujyrymdamaǵa sáikes júzege asatyn infraqurylym jobalary týraly baiandady. Olardyń sózinshe, barlyq parkter aýmaǵynda 2021-2023 jyldar aralyǵynda vizit-ortalyqtar, glemping, kempingter, etno-qonaq úiler, etnoaýyldar, kórý alańdaryn jáne basqa da infraqurylym nysandaryn salý josparlanǵan. Barlyq nysandar negizgi tabiǵi nysandarǵa ziian tigizbes úshin qashyqtaý jerde ornalasady.
Investorlarǵa erekshe qorǵalatyn aýmaqtar týraly Zańdy saqtaý, tabiǵi nysandardy buzbai, qorshaǵan ortany qorǵaý sharalaryna basymdyq bere otyryp jumys isteý talaby qoiylady. Tabiǵatqa ziian keltiretin sharýashylyqqa tyiym salynady.
Sonymen birge jiynda Qoǵamdyq keńes músheleri ekotýrizmdi damytý jobasyn júzege asyrýshylardyń jergilikti halyqpen tyǵyz jumys isteýi tiistigi týraly aitty.
«Ulttyq parkter janyndaǵy Qoǵamdyq keńester qabyldanǵan sheshimderdiń ashyqtyǵyn qamtamasyz etý maqsatynda quryldy. Sondyqtan Qoǵamdyq keńes músheleriniń pikiri kez kelgen sheshim qabyldanǵan kezde eskeriledi. Ulttyq parkterdiń jerlerin týristik jáne rekreatsiialyq qyzmetti júzege asyrý maqsatynda uzaq merzimdi paidalanýǵa berý boiynsha qurylǵan konkýrstyq komissiialar quramyna da Qoǵamdyq keńester músheleri qosylady»,- dedi Erlan Nysanbaev.
Aita keteiik, ulttyq parkterde ekotýrizmdi damytý boiynsha baiqaýǵa qyzyǵýlylyq tanytqan kez kelgen investor qatysa alady.
