Germaniiada 17 jyl boiy eńbekke jaramsyzdyq paraǵynda bolyp, osy ýaqyt ishinde tolyq jalaqy alǵan kolledj oqytýshysynyń isi elde úlken qoǵamdyq rezonans týǵyzdy. Osy oqiǵadan keiin Soltústik Rein – Vestfaliia jeriniń parlamenti memlekettik qyzmetkerlerge qatysty zańnamany qatańdatatyn jańa zań jobasyn qarastyryp jatyr.
Jańa qujat qabyldansa, memlekettik qyzmetkerlerdi mindetti meditsinalyq tekserýge jedel jiberýge jáne tekserýden jaltarǵandarǵa tólenetin jalaqy men áleýmettik tólemderdi toqtatýǵa múmkindik beriledi.
17 jyl sabaq ótkizbegen
Der Spiegel basylymynyń málimetinshe, Vesel qalasyndaǵy kolledj oqytýshysy 2009 jyldyń tamyz aiynan beri birde-bir sabaq ótkizbegen. Soǵan qaramastan, ol 17 jyl boiy eńbekke jaramsyzdyqqa bailanysty tolyq kólemde jalaqy alyp kelgen.
Basylymnyń jazýynsha, osy ýaqyt ishinde áiel adam óziniń densaýlyq jaǵdaiyn resmi tekserýden ótkizý úshin dárigerdiń qabyldaýyna barmaǵan.
Alaiaqtyq boiynsha qylmystyq is qozǵaldy
Bul jaǵdai 2025 jyly buqaralyq aqparat quraldarynda jariialanǵannan keiin Diýsseldorftyń aimaqtyq biligi tártiptik tergeý bastaǵan.
Sonymen qatar Dýisbýrg prokýratýrasy alaiaqtyq faktisi boiynsha qylmystyq is qozǵady. Tergeý nusqasyna sáikes, áiel adam eńbekke jaramsyzdyq paraǵynda júrgenine qaramastan, 2012 jyldan beri gomeopat retinde jumys istegen bolýy múmkin.
Densaýlyq jaǵdaiyna bailanysty zeinetke jiberý týraly sheshimge qarsy shyqty
Biyl mamyr aiynda oqytýshy meditsinalyq tekserýden, onyń ishinde psihiatriialyq saraptamadan ótken.
Tekserý qorytyndysy negizinde Diýsseldorftyń aimaqtyq ákimshiligi ony densaýlyq jaǵdaiyna bailanysty merziminen buryn zeinetke shyǵarý týraly sheshim qabyldaǵan.
Alaida áiel bul sheshimmen kelispei, sotqa shaǵym túsirgen. Sondyqtan is boiynsha sot protsesi taǵy birneshe aptaǵa nemese birneshe aiǵa sozylýy múmkin.
Zańnamany kúsheitý usynyldy
Soltústik Rein – Vestfaliia landtagynda qaralyp jatqan zań jobasy dál osyndai jaǵdailardyń qaitalanýyna jol bermeýdi kózdeidi.
«Jasyldar» partiiasynyń depýtaty Simon Roktyń aitýynsha, jańa tártip memlekettik qyzmet júiesine degen senimdi kúsheitip, jekelegen zań buzýshylyqtardyń adal eńbek etip júrgen myńdaǵan memlekettik qyzmetkerdiń bedeline nuqsan keltirýine jol bermeýi tiis.
Eger zań qabyldansa, memlekettik qyzmetkerler meditsinalyq tekserýden jaltarǵan jaǵdaida bilik olardyń jalaqysy men basqa da tólemderin ýaqytsha toqtata alatyn bolady. Bul Germaniiadaǵy memlekettik qyzmet salasyndaǵy baqylaýdy kúsheitýge baǵyttalǵan mańyzdy ózgeristerdiń biri bolýy múmkin.
